No tin mucho rekisito pa core un quad racer na Aruba. Pa motibo di esey e control tambe ta limita.
Esaki ta e resultado di Bon Dia su investigacion despues un accidente riba 23 di januari na Paradera ora un turista a perde control y dal den cura di un cas.
Esaki a sosode den un bario di residencia unda tambe un compania di huur quad ta situa. E habitantenan no ta mucho contento tur ora cu e molester di specialmente turista cu no tur ora sa di maneha e vehiculo bon. Y un grupo di habitante kier un solucion en general pa motibo cu e compania ta uza e caminda publico pe su clientenan test drive, cu tur riesgo y molester.
Pa motibo di esaki tin basta accidente na Aruba sosodiendo cu turistanan coriendo quad.
Bon Dia a puntra e compania concerni ‘Cheri Quad & Bike Rental pa un reaccion. Entre otro kico nan ta haci pa evita incidente manera esun riba 23 di januari. E doño Isaac Manuel De Jesus ta bisa cu prome cu nan sali bay off road, nan ta laga e turistanan dal un par di buelta den bario pa test nan capacidad. E ta admiti cu e dia ey cos a bay robes pero ta un ‘eror chikito’ y banda di su seguro, e tambe a cubri gasto di 300 florin pe drecha e cura.
Banda di esaki e no ta prohibi di core quad riba caminda publico tanten e vehiculonan ta sigura. Y segun e doño esaki ta e caso cu su quad nan. E tambe ta bisa cu recientemente el a skirbi un carta pa Departamento di Transporte Publico (DTP) pa yuda nan cu cierto rekisitonan cu falta.
Control limita
Pero locual Bon Dia ta constata a base di un entrevista cu e director Gerald Keteldijk di DTP, ta cu nan tin un autoridad limitativo den e area aki. E ta bisa cu nan ta controla si esun cu e permiso ta keur su vehiculonan y tambe ta controla tur papel. Por ehempel e plachi number.
Fuera di esaki, ta polis y e companianan di huur mes ta responsabel pa locual ta otro rekisitonan, e ta remarca.
Polis: tiki rekisito
Vocero di Polis di Trafico, Loefstop ta bisa Bon Dia cu no tin mucho luga den nan departamento pa controla companianan di huur riba cierto rekisitonan manera e leynan di trafico. Esaki segun sr. Loefstop ta e responsabilidad di e companianan di huur mes pa instrui e turistanan apropiadamente. Tambe e ta agrega cu mester paga belasting y seguro pa por core cu quad riba caminda publico.
Accidentenan den pasado
Un di e accidentenan mas tragico cu a pasa na Aruba te ainda relaciona cu turista riba quad, ta e caso cu a tuma luga den april aña 2010. Frederich Norman, 41, a fayece y su casa Christine Norman, 37, a keda herida den un accidente riba quad despues cu un truck a dal nan riba caminda. Diario Aruba ta bisa cu bayendo pabao riba L.G Smith Boulevard rumbo pa beach, nan a haya nan inespera contra un Dodge Ram Pickup biniendo for di direccion contrario cu a desvia y dal riba nan, y tambe riba dje nan no tabata tin helm bisti pa proteha nan cabes.
