Aunke tin paisnan cu nan empresa di utilidad a cay den man di sector priva, director di Water- En Energiebedrijf Aruba N.V. (WEB) Luis Oduber no ta premira cu algo asina lo por sosode cu WEB.

A pesar cu for di 1992 gobierno di Aruba a privatisa WEB como un N.V., el a keda un empresa estatal for di cual gobierno ta su unico accionista. Sr. Oduber a bisa cu e compania aki cu actualmente ta un patrimonio di pueblo, ta hopi stabiel financieramente y awe ta celebrando 85 aña di existencia. “No ta keda na nos pero, mi no ta weita den termino corto of largo un motibo pa un gobierno desea bende e compania”, el a declara na Bon Dia Aruba.

“No ta keda na nos pero, mi no ta weita den termino corto of largo un motibo pa un gobierno desea bende e compania”,Na momento cu un compania manera WEB cu ta produci tanto awa como coriente ta cay den compania priva, “bo ta hinca tur bo desaroyo den man di un tercera”.Aunke nan por mara un compania priva na cierto clausulanan,  pero bo ta keda “rehen” di e compania. “Aworaki nos ta di gobierno y ademas cu nos ta produci awa y energia di calidad, y nos ta logra nos metanan financiero, mi ta kere of mi ta asumi cu gobierno lo mantene WEB manera cu ta”, e director ta bisa na e matutino aki.

Generacion di coriente y futuro
Sr. Oduber no ta descarta cu nan lo mira cambio riba produccion di coriente, mirando e desaroyonan cu ta tumando luga actualmente. Sr. Oduber ta mira cu mas y mas consumidor lo genera nan propio coriente na cas y di e forma aki nan tambe lo bira productor di energia. Te hasta e ta weita cu kisas den futuro WEB lo mester produci menos energia y te hasta kisas lo tin mas cu un productor di coriente.

E director a afirma si cu produccion di energia ta keda un tarea importante pa WEB pero e cantidad di energia sostenibel manera di solo y biento lo aumenta mas y mas, compara cu energia tradicional.  “Hecho ta cu energia sostenibel no ta un fabula mas. Na mes momento e almacenahe di energia ta bira mas y mas factibel. Baterianan ta desaroya den tur forma y compatibilidad.”

Sr. Oduber ta agrega cu diferente fuente di energia ta rekeri un operacion di produccion diferente. E ta mira cu software pa maneha un operacion combina cu fuente di energia tradicional y sostenibel ta bira mas y mas inteligente y factibel. ‘Tur e trendnan aki ta influencia e tarea di WEB como productor di coriente”, e la laga sa. WEB ta consciente cu no por sinta keto si nan kier keda cumpli cu cliente y comunidad. P’esey nan ta monitor tur tendencia, explora posibel solucion y cambio cu esakinan ta trece cu ne.
E director ta sigui comenta cu durante 85 aña di e planta nan a adapta constantemente na cambionan pero nan ta realisa conscientemente cu mayoria di cambio drastico a tuma luga durante e ultimo 11 aña na WEB. “E futuro desaroyo ta mustra cu innovacion  y desaroyo lo acelera pa aña mas hopi enbes cu decadanan”, el a declara. Sr. Oduber ta opina cu hunto cu nan trahadonan, na man cu Elmar y Utilities Aruba y logicamente gobierno di Aruba, nan tin cu prepara pa e retonan cu futuro semper ta trece cu ne.

Produccion di awa
Pa loke ta  produccion di awa ta otro situacion cu esun di produccion di coriente. Aunke tin paisnan -specialmente esunnan yama di tercer mundo-  caminda nan fuentenan natural di produccion di awa ta wordo bendi cu paisnan poderoso, e risico aki no ta existi pa nos pais pasobra nos produccion di awa ta basa riba awa di lama. Nos no tin awa natural y esun di yobida ta masha tiki. Pero nos tin awa di lama cu ta wordo procesa y desalina pa bira un awa di calidad halto pa bebe.