Bon Dia Aruba a haci algun pregunta durante varios conferencia di prensa, asina como tambe via e-mail y telefon cu e obhetivo di haya un motibo medico valido of si tin un motibo di orden publico pa sigui cu e implementacion Toque de Queda aunke e cifranan di casonan positivo di COVID-19 a baha.

Tocante esaki, alto comisario di KPA, Vanessa Tjon Kock a contesta pa Bon Dia Aruba cu esaki ta un medida caminda cu orden publico ta haya su enfasis, cu cuerpo policial ta keda encarga cu e medida aki. Pero ta keda un medida cu a wordo treci den cuadro di crisis di coronavirus cu te ainda no a caba. “Ta berdad cu no tin mas casonan activo, pero e crisis no a caba”, el a señala.

E motibo pakico Toque de Queda a sigui no ta un decision di un solo instancia of un solo minister. P’esey ta existi un crisis team cu un maneho cu ta delibera un medida asina, di parti di salubridad publico tambe tin su parti positivo pasobra den e momentonan aki hospital mester tin experticio si algo mester pasa, Tjon Kock a expresa.

Di otro banda, Directie Volksgezondheid (DVG) a laga sa via su vocero Jurette Croes cu e dos motibo pakico esaki ta na vigor ainda ta pa proteha e capacidad na Hospital Dr. Horacio Oduber. A expresa cu ‘no ta desconoci na Aruba den oranan di marduga tin accidentenan cu por ta hopi grave y cu por ocupa e area di ICU’. Ademas el a declara cu ‘pa motibo di orden publico, den temporada di crisis, atraco y robo ta conoci pa aumenta’.

Di loke ta trata e prome argumento di DVG, Bon Dia Aruba a haci un pregunta specifico pa DVG si nan por proba a base di data concreto cu accidente di auto den oranan di anochi ta mas grave cu esun cu ta sucede den oranan di dia, pa motibo cu a base di esaki DVG y gobierno a saca su conclusion y tuma decision specificamente pa mantene e Toque de Queda vigente.

Di dos, Bon Dia Aruba a puntra si por sostene e argumento cu si den crisis aki cambernan di ICU solamente lo wordo ocupa cu personanan di accidente di auto y no tin mas pashent cu ta sufri di otro malesanan por ehemplo, stroke y atake di curason, cu tambe ta rekeri un luga den ICU.

Di esaki, Bon Dia Aruba no a logra haya un contesta y a dicidi di tuma contacto cu minister di Salubridad, Dangui Oduber riba e mesun preguntanan. El a contesta cu ‘den prome instante, a introduci e medida aki pa hendenan por keda paden y limita movecion di persona riba caya den oranan di anochi pa por maneha e transmision y evita cu mas hende ta wordo contagia pa Covid-19’.

Den Oduber su opinion, ‘Toque de Queda ta valido awor pasobra cu e ta trece un trankilidad na hospital cu nos mester di dje. Pa por flexibilisa medidanan cu ta importante pa bo tin capacidad di cuido. Actualmente e cantidad di trauma pashentnan na spoedeisende hulp ta hopi abou den oranan di anochi. E trauma pashentnan aki por resulta cu nan mester cuido intensivo y esaki ta pone presion adicional riba nos capacidad’.

Ademas, a puntra Oduber si ta existi dato concreto pa sostene DVG y minister su afirmacionnan cu accident di auto grave ta pasa mas den oranan di anochi so, pa loke el a declara cu ‘den tempo ey no tabatin COVID-19 y awor si. No solamente ta trata accidente di auto, pero si di otro tipo di trauma como pashentnan cu ta relata abuso di alcohol y droga’, minister a sigura.

Den un investigacion cu Bon Dia Aruba a haci tocante e ponencia cu accidente di auto ta e motibo pa sigui cu Toque de Queda, y den opinion di Oduber hunto cu esun di DVG cu te na e momentonan aki no por a sostene e argumento ey cu documentonan of estadistica concreto, sea di hospital of di KPA, BDA a wordo pidi e data concreto, pero te ainda no a logra esaki ni di DVG ni di Oduber.

No obstante, Bon Dia Aruba a sigui cu e investigacion y a tuma contacto cu un specialista di hospital cu su nomber ta keda anonimo, na ken a wordo puntra si hospital tin estadistica di cuanto persona cu a haya accidente di auto a bay den ICU. Pa esaki el a contesta cu hospital no ta mantene e tipo di datonan aki, solamente cu personanan cu ta fayece.

Asina mes, el a confirma cu no tin motibo medico valido pa sigui cu implementacion di Toque de Queda, pa via cu aworaki ICU tin un persona so den ICU y tin 33 ventilator disponibel.

Di mesun manera,tambe Bon Dia Aruba a puntra pa un otro specialista Dr. Jaime Falconi tocante esaki pa lo cual el a contesta: “Si e argumento ta cu accidentenan di trafico lo por surpasa e capacidad di e cuido intensivo, anto duna e informacion cuanto accidente a tuma luga durante un aña na Aruba, e ora cu esakinan a sosode y cuanto a rekeri cuido den ICU. Ta bon pa ta debidamente prepara pa un posibel ola nobo di contagio y p’esey no ta necesario pa recuri na argumento sin base pa keda mantene un TDQ awor.”