Despues di e sesion maratonico di tratamento di e propuesta di ley (di iniciativa) e siman aki tin un aparente realidad: no tin un mayoria pa aproba e cambio di ley cu mester facilita e posibilidad di matrimonio pa pareha di mesun sexo. Cu 10 voto na fabor y 10 contra, e ultimo voto di abstencion a haci cu e proyecto di ley, den mesun forma o cu cierto adaptacion, por bolbe ainda den parlamento. Un accion resaltante cu por lo pronto ta parce di scapa e situacion dentro di e coalicion, ya cu e fraccion di e partido junior den e coalicion ta apoya enteramente e propuesta. Di e partido grandi den coalicion tabatin casi un unanimidad di posicion contra e propuesta, cu un solo voto na fabor. Den e otro partido grandi tambe tabatin un aparente votacion a base di escogencia personal, cu voto tanto pro como contra. Tur esaki ta crea un situacion un poco peculiar, mientras pronto lo tin e veredicto final di Corte Supremo (Hoge Raad) den e caso di casacion cu gobierno di Aruba a entama contra decision di Corte di e Islanan. Den e sentencia ey Corte a opina cu articulo 1 di Constitucion di Aruba no ta laga otro opcion pa gobierno di Aruba cu percura pa e cambio di ley keda realiza, ya cu no cumpli cu esaki lo ta viola derecho constitucional di e persona cu ta desea di por contrae matrimonio cu un persona di mesun sexo.

Gobierno a opone e idea cu Corte ta practicamente ordena gobierno pa tuma paso den e asunto aki pa termina e discriminacion constata. Den un anterior Editorial nos a trece dilanti caba cu esaki ta un punto di peso, primordialmente pasobra gobierno no por ordena parlamento pa aproba tal propuesta di ley, y ta na tal punto nos a yega awor: si no tin 11 voto den parlamento, no lo tin cambio di ley… Y como cu ta trata aki di un asunto unda mas cu den cualkier otro caso, e conviccion y pensamento personal di e parlamentario ta hunga e papel principal pa determina su voto, ta bira dificil pa logra algo si no tin suficiente voto.

E pregunta ta awor con e cuestion aki mester sigui. Tin hopi speculacion tocante con e veredicto di Hoge Raad lo ta. Crucial den esaki ta si Hoge Raad ta sigui e interpretacion di Corte di e Islanan, cu Constitucion di Aruba ta bisa cu no ta permiti ningun discriminacion, entre otro, a base di genero. Si e veredicto di Hoge Raad ta confirma esey, ainda ta keda e punto cu esaki no automaticamente ta encera un ‘orden’ pa percura pa pasa e cambio di ley. Loke si e lo ta, un advertencia serio di e tribunal mas halto den nos sistema hudicial, cu Pais Aruba, incluyendo gobierno como poder ehecutivo, y tambe parlamento como poder legislativo, segun opinion di Corte Supremo lo ta den violacion di nan propio Constitucion, si no ta permiti e cambio tuma lugar. Esaki por conduci na cambio di posicion di un o mas parlamentario, loke por haci e cambio di ley posible ainda. Sin embargo, esaki ta keda un asunto di un cambio di posicion voluntario, no tin sancion contra ningun parlamentario cu no kier cambia di opinion, a pesar di ignora sentencia di Hoge Raad.

Den tur esaki ta importante señala cu den e debate, den parlamento y pafor, tin algun argumento cu ta parce nos peculiar, por lo menos. Por ehemplo, bisa cu mayoria di ciudadano ta creyente, e mayoria catolico, y cu esey ta implica cu mester respeta loke iglesia(nan) ta ordena. Pa cuminza, ken a bisa cu tur creyente ta pensa mescos cu e iglesia? Nos no ta mira cu den Vaticano mes a bin un suavizacion di opinion den e asunto aki? Ademas, nos ta keda cu e principio basico di separacion di estado y iglesia, loke ta haci cu finalmente 21 miembro di parlamento mester vota pa un ley, cu no ta kita ningun derecho di esun cu ta prefera un matrimonio tradicional entre muher y homber. Si di berdad e pensamento ta cu mayoria di pueblo, cu segun e banda aki den e debate ta creyente, anto lo mester a propone un referendum pa laga tur votador duna nan opinion. Ademas, pakico no maneha e instrumento di consulta popular aki den otro asunto di peso, si ta kere cu esey lo ta un forma mas adecua. Tin varios pais, manera Suiza, un democracia respeta, unda e tipo di asunto di peso aki ta keda dicidi den un plebiscito. Esey no a sucede aki y ta significa cu 21 persona, elegi pa comunidad, lo mester dicidi pa nos. Por ta cu e casi empate cu tin actualmente den parlamento ta un refleho bastante realistico di con e corelacion di posicion pro o contra ta actualmente den pueblo. Si esey ta e caso, ta keda e pregunta anto ta pakico mester a trece e debate awor, a sabiendas cu no tabatin e votonan necesario pa aproba e ley.

O, talvez nos mester mira e asunto di un otro angulo, esta cu gobierno a crea e scenario aki, pa mustra nan ‘bon voluntad’ pa no permiti e cambio di ley sin mas, pero si, y ora, e veredicto ta cu Corte Supremo ta interpreta Constitucion manera e Corte anterior a haci, ta bay tin un mayoria, chikito, pa pasa e ley? Asina nan por ‘keda bon’ cu tur hende, pasobra no a permiti aprobacion na promer instante? Nos lo sa mas despues di e sentencia di Corte Supremo…