Presidente di organisacion ambiental Rainbow Warriors International sr. Milton Ponson ta duna nos comentario y punto di bista riba un par di desaroyo/proyectonan turistico planea, cual algun di nan ta den un estado basta avansa caba pa loke ta ehecucion. E organisacion ta constata cu no tin un maneho drechi na Aruba ora ta trata di realisa proyectonan sostenibel y diversifica nos producto di turismo.
Segun sr. Ponson ta splica nos den un ehempel, un proyecto cu ta cay bao di categoria di Boutique Resort/Eco Resort na Malmok, esta Ocean Z, a cuminsa construi e resort despues di a pidi tur sorto di permiso di gobierno y no haya contesta. Manera cu nos a yega di informa riba esaki caba, ora cu e resort aki tabata casi cla pa habri, e bisiñanan a cuminsa cu casonan den corte cual nan a gana.
E desaroyadonan a bay corte comun di apelacion anto huesnan a dicidi di elimina e veredicto di corte di prome instancia na Aruba. Sr. Ponson: “E desaroyadonan a sinta warda envano riba contesta di gobierno anto dal bay y hinca placa aden. Teniendo na cuenta inversionnan cu a wordo haci anto cu ta den area turistico, e huesnan a dicidi cu e proyecto tin cu sigui. Si nos pone esey en balans cu loke ta pasando na isla di oro, nos ta constata cu no tin un maneho drechi akinan.”
Proyecto Zoetry Isla di Oro
Manera cu nos a publica anteriormente, tin algun desaroyo nobo planea na Isla di Oro Pos Chikito unda cu kier bin cu un di e poco centronan turistico riba awa den zona di Caribe, cu suitenan estilo exotico manera tin caba na e isla Bora Bora. Esaki ta un compleho cu lo ofrece un spa y brinda tambe paseonan educativo di e mangelnan, rifnan di e zona y observacion di parhanan for di un toren. Ademas tin pensa di bin cu otro actividadnan relaciona cu lama, ningun di nan uzando ekipo di motor. Tin proyectonan parecido na esaki rond mundo anto recientemente a habri dos mas parecido na Jamaica y otro isla panort den area di Caribe. “Manera mayoria otro NGO’s ambiental, nos tabata tin discusion y intercambio di informacion cu e desaroyadonan di proyecto Zoetry. Nos ta haya cu te aworaki con e proyecto a wordo trata, tanto den medio di comunicacion, den un forma desbalansa y tambe di parti di gobierno un actitud ambiguo. Den sentido cu gobierno su liña di maneho no tabata cla si tabata pro of contra e proyecto,” sr. Ponson ta bisa.
Estudio impacto ambiental
E proyecto di isla di oro recientemente a entrega un di su ultimo rekisitonan cu gobierno a pone pe cual ta un estudio di impacto ambiental. Rainbow Warriors a haya un copia y ta bisa cu ta un di e estudionan di impacto ambiental mas extenso cu nan a yega di wak pa Aruba te ainda. Sr. Ponson: “E ultimo estudio cu nos a yega di wak cu tabata asina extenso asina ta esun di Vaderpiet y Urirama. Nos ta kere cu tur organisacion ambiental, den un forma profesional mester acerca tur e desaroyadonan di proyectonan y no bay ataca nan for di un caminda scondi. Acerca nan na prome instancia, pidi nan tur e informacion, wak kico e proyecto ta encera y exigi di nan pa mustra bo tur documento cu gobierno tambe a exigi. ”
Segun Rainbow Warriors, e proyecto na isla di oro ta bay tin su retonan pero no lo trece daño pa e medio ambiente den su ehecucion.
Area di conservacion
Despues di a evalua tur e informacion, ta na gobierno pa dicidi si e proyecto na isla di oro ta bon of no pa sigui cu ne. “Pero gobierno no kier bisa si of no. Nos tin e problema adicional cu e mangelnan di isla di oro mester bira un area proteha cual lo cay bao Parke Nacional Arikok. Nos tin entendi cu esey ta conta pa e mangel so pero cu tur loke tin di beach cu islanan den lama mes no ta cay den area di conservacion.” Esey kiermen segun sr. Ponson cu den un manera of otro minister di infrastructura tin cu duna contesta riba cuanto tempo mas gobierno ta bay dura prome cu nan tin tur cos riba un rij pa por bisa e desaroyado finalmente si of no. Mester tene cuenta cu desaroyado ta hincando placa aden y no a haya ainda ningun indicacion si ta bay sigui cu e proyecto anto inverti mas placa. Esaki no ta manera pa trata cu ningun inversionista na Aruba,” sr Ponson ta splica.
Proyecto Malmok
Segun sr. Ponson, ta parce cu como desaroyado na Aruba bo mester paga bao mesa of gewoon dal bay, hinca hopi placa aden pa hues despues dicidi cu proyecto ta sigui pa motibo di inversion halto y esaki no ta un bon maneho. “Aworaki aparentemente tin otro proyecto na Malmok na unda ainda no ta conoci si ta pa uzo residencial of comercial. DIP y minister ta desmenti pero tin algo pasobra esunnan cu a saca e informacion riba rednan social y prensa lo mester a wak documentonan cu ta indica algo contrario di loke personal di DIP y minister a indica, ” sr. Ponson ta bisa.
Diversifica producto turistico
Sr. Ponson ta conclui cu Rainbow Warriors como organisacion den pasado, hunto cu otro experto y profesional na Aruba manera Castro Perez a yega di bisa cu mester diversifica nos producto turistico. “Boutique Hotels y Eco Resorts cu ta proyectonan low rise, low impact riba medio ambiente, intensivo den cantidad di cupo di trabao cu nan ta genera, atraccion na tipo di turista un tiki diferente (cu ta busca exclusividad), ta e tipo di turismo cu nos mester cuminsa cultiva. Tin demasiado high rise hotel di luho, demasiado timeshare y all inclusive caba. Si nos kier diversifica e producto turistico nos tin cu bay den direccion di boutique y eco resort. Dicon tanto dolor di cabes pa e desaroyadonan di e tipo di proyectonan aki logra haci net esey? Den e ultimo ocho aña tabata tin un maneho basa riba diversifica nos producto di turismo? Basa riba e casonan cu mi a menciona e contesta lo mester ta no.”
