No tin gobierno ainda… Y pa bon motibo…?

Medionan di comunicacion ultimamente a cuminza expresa preocupacion pa e aparente tardanza den negociacion entre e dos partidonan cu ta purba yega na un gobierno nobo. Pero esaki realmente mester ta motibo pa preocupacion? Yega rapidamente na un acuerdo pa por cuminza goberna tambe por ta un ‘recipe for disaster’, di esey tambe tin suficiente ehemplo. Segun nos opinion, tin otro splicacion pa e tempo cu e partidonan ta tuma, mirando cu riba varios tema e partidonan ta bastante leu di otro. Algun di e asuntonan aki tabata obheto di discusion den nos medio tambe.

Nos a menciona por ehemplo e asunto di e ley di supervision financiero, unda e contenido di e ley local mester pasa pa un ley di Reino, manera en principio acorda cu Hulanda pa e gabinete saliente. Esey ta e acuerdo cu Hulanda, pero aki na Aruba lo keda mira e resistencia contra e ley di Reino den seno di ambos partido grandi, esun saliente y esun cu posiblemente ta drenta pa lidera e siguiente gabinete. Esaki ta pone e proximo ‘junior partner’ den e gabinete dilanti un dilema: scoge pa drenta gobierno cu un partner cu riba un punto asina importante ta mantene su oposicion contra e ley di Reino lo ta un mal comienzo, sigur si nos tuma na cuenta cu pa mei di e aña aki Hulanda ta spera di tin un contesta cla y definitivo di Aruba. Bo no por forma gobierno tratando di ‘suaviza’ e asunto aki, si aki un par di luna ya bo gabinete por sufri un naufrago fatal ora e partidonan den coalicion tuma un posicion contrario den e asunto aki. Unico solucion: yega na acorda implementacion di un ley di Reino y continua e consulta cu Hulanda pa e demas detayenan cu mester defini ainda. Caso contrario, e partido chikito mester bandona su apoyo na e ley di Reino? Nos no ta mira esey como posibilidad, ya cu esey lo kita tur credibilidad cu e partido a gana den ultimo eleccion.

Un posible alternativa lo ta cu e partido grandi ta laga su oposicion contra e ley cay, a sabiendas cu den parlamento tin un mayoria grandi, di tanto e partido democrata cristian y e partido social democrata, cu nunca tabata desea y sigur no awor tampoco un ley di Reino. Esey ta causa caba cu, manera nos por a mira den e ultimo añanan, un ley di Reino, en todo caso uno di consenso, ta keda un ilusion. Y como cu gobierno(nan) Hulandes, di diferente signatura, a mustra un miedo di impone un ley di Reino di otro manera, e situacion proximamente por ta cu nos ta sigui cu e ley local di supervision, y asumiendo tur e consecuencianan financiero di nenga e facilidadnan di interes reduci cu Hulanda ta ofreciendo.

Pero tin mas problema na caminda cu tin di haci cu e relacion cu Hulanda. Secretario di Estado den su comunicacion cu Tweede Kamer a referi na e mehoracion cu ta spera na e islanan di e reforma den e aparato publico, cu mester duna mayor garantia contra corupcion. No ta papia aki di corupcion ‘chikito’ sino di e ‘grandi’ cometi pa hustamente esnan cu mester ta guardian di integridad. Esaki ta e fenomeno cu mas ta preocupa e parlamentarionan Hulandes, mirando e serie di mandatario cu a haya nan mes den problema cu husticia pa nan comportamento criminal. Den e contexto aki, kico un ciudadano consciente y cumplidor mester pensa di un partido cu a mira varios di su (ex)ministronan investiga y encarcela pa corupcion, mientras ni un dia e partido a pronuncia un palabra contra e tipo di proceder criminal aki, al contrario a celebra cu un ex-ministro cu a haya ‘djis un aña so’ di condena. Despues a bin e baño di awa friu di Corte di Husticia, cu a confirma e exigencia inicial di Ministerio Publico di 4 aña. Awor, hustamente un di e parlamentarionan cu a bandona e partido y a declara su mes independiente pa via di e situacion den seno partidario, mester bay acorda plan pa mehora proceso administrativo cu e mesun partido ey, cu aparentemente no ta capaz di reconoce nan problema interno di gran tolerancia pa corupcion?

Cu e interogantenan cu ta rondona e intento di formacion di gobierno aki, e asunto no a caba ainda. Mester contempla tambe e posibilidad di formacion di gobierno cu e otro partido grandi, si e intento aki no logra. Aki e condicionnan no ta mucho mihor. Den e asunto di e ley financiero ta berdad cu e promer ministro saliente a firma pa un ley di Reino, pero cada ken cu dos placa di tino sa cu e obhetivo ta pa continua e ‘guera di trinchera’ cu a caracteriza e relacion cu Hulanda desde 2017, y mas ainda desde e crisis di pandemia. Nos por mira atrobe e opcion pa bisa Hulanda ‘si’ como gobierno, mientras den parlamento ta frustra cualkier intento pa yega na aprobacion di e ley cu un rotundo ‘no’, apoya pa e otro partido grandi. Loke nos ta mira aparece awor ta e situacion den cual un partido chikito, pa exito cu nan por tabatin den eleccion, ta mira e limitacion di su deseonan pa e simple hecho cu nan mester scoge entre dos partner grandi, cu sa masha bon kico ta ‘at stake’ pa nan: cuatro aña den oposicion, o cuatro aña di reparticion di puesto y privilegio pa nan seguidornan. Nos ta warda cu pacenshi riba e resultado; tin un gabinete demisionario pa atende asunto coriente…

LJMADURO – 24-JAN-2025