Presidente di sindicato FTA, sr. Hubert Dirkzs a papia cu Bon Dia Aruba riba e topico controversial y actual tocante maneho cu gobierno kier implementa riba hotel “all inclusive”.
E sindicalista a trece dilanti cu “all inclusive” na Aruba a drenta na momento cu e situacion a bira dificil pa nos turismo. “Ora cu situacion a bira dificil, e ta bira cierto momento atractivo pa cierto gruponan”, e sindicalista a declara na e media aki.
Sindicalista sr. Dirkzs su opinion ta cu “time share” y “all inclusive” a bira atractivo, y cierto momento ambos a yuda nos industria turistico ora cu turismo a cay.
“Nos sa cu si bo tin un nivel di all inclusive halto, berdad tin e tendencia di pensa cu e grupo ey di turista cu ta bin cu pakete all inclusive, lo no sali for di hotel pa bay haci compras den centro di ciudad pa ehempel”, el a declara. Como presidente di FTA, sr. Dirkzs a bisa cu e no ta kere esey.
Nivel halto
E lider sindical aki ta kere cu e “turista cu ta bin pa all inclusive mas tanto e ta bini pa facilidad”. E ta haya cu si e turista ta di un nivel halto cu tin recurso of entrada economico, e lo haci uzo di e otro atraccionnan cu tin na Aruba. Y si e atraccion aki ta bon y cu tin bon mercadeo pa nan, sigur nan lo yuda.
Sinembargo e ta haci e aclaracion cu esaki no kiermen si cu nos lo haci full Aruba all inclusive. Pasobra si realmente esey ta e caso, lo por limita e situacion di hotel all inclusive, den un sentido cu nan lo wordo desaroya den otro parti di nos isla.
“Cual nos ta kere cu no ta faborabel tampoco. Pasobra mas cu Aruba den su totalidad mester ta e producto turistico, cada facilidad cu e turista ta haci uzo di dje y cada atraccion of servicio cu e haya, mester ta di un bon nivel…”, segun presidente di FTA. E bon nivel di calidad aki ta garantisa cu e turista lo keda contento y cu eventualmente e lo por bin bek.
“Aruba ta chikito. Nos no por yen’e cu tanto hotel. Si nos ta bay pone mas, nos mester pone nan riba nivel hopi halto”, el a bisa. El a trece e ehempel e concepto di boutique hotel cu ta bay garantisa un nivel halto di turista, pero nos mester corda cu e turista no ta bin pa keda den hotel so.
No tin espacio pa cortamento
E ta haya cu si na Aruba nos ariba un 40% di all inclusive actualmente, nos mester wak sigur pa e hotelnan cu tin “all inclusive” caba, si nan a basa nan mes riba esey, no ta na su luga pa bay “corta” nan. Pero si –segun presidente di FTA- e mester wordo regula. Den e regulacion aki e all inclusive mester keda na un nivel halto y e IP (Important Person) mester keda na un nivel halto. “Na momento cu turista yega Aruba te ora cu e ta bay, e mester keda contento di e servicio y e calidad di e producto cu e ta haya”, segun sindicalista Hubert Dirkzs.
E ta kere cu nos producto mester wordo vigila bon y cu den un all inclusive e por tin efecto cu “bo no lo desea”.
Sindicalista Dirkzs di FTA a indica tambe cu e nivel di all inclusive cu ta existi na Aruba, no ta uno di e malo ey. Sinembargo tin espacio pa mantene un nivel halto di turista cu tin recurso economico y cu no necesariamente mester keda mara na un hotel cu solamente tin buffet y no tin a la carta den nan restaurant. Tambe bo por haya un all inclusive na un nivel hopi halto cu ta e caso parcialmente na Aruba.
