Diadomingo atardi a tuma luga e concierto di scol di musica Rufo Wever na Cas di Cultura,aki ta unda cu studiantenan a duna un concierto combina y varia den estilo di cancion, instrumentonan.

E concierto di scol di musica Rufo Wever ta duna e concierto dos bes pa aña cual e prome ta tuma luga na fin di aña escolar y e otro na december cual ta enfoca mas riba temanan di Pasco cu ta wordo duna na Cas di Cultura.

Bon Dia Aruba a combersa cu Johnny Croes kende tin 18 aña dunando les di piano y ta un di e meneernan na scol di musica Rufo Wever . Sr. Croes a splica nos cu muchanan di 6 aña ya caba por haya les na scol di musica. E muchanan aki mester cuminsa prome cu un curso di dos aña, di cual e mucha por kies un instrumento di su gusto ora nan tin 8 aña , entre otro guitara, piano, drum etc.

E curso aki ta un ‘algemene muzikale vorming’ cual ta un educacion general di musica, na unda cu a mucha ta siña diferente cosnan manera con ta lesa y toca musica. Un mucha entre 5 pa 7 aña ta sigui un curso cual ta duna nan splicacion di e instrumentonan pa asina wak cua instrumento nan in mas interes aden, pero esaki ta depende di atencion of interes cu e mucha tin.

Bon Dia Aruba a puntra sr. Croes si tin un edad maximo pa por haya les na scol di musica Rufo Wever. El a aclara cu no tin edad pa toca musica ‘e por tin 20, 30, 40, tabata tin alumno cu tabata tin 50 hasta 60 aña’ el a splica y cu por adapta esaki cu un curso pa adulto.

“Nos tin un curriculum di 7 aña di cual tin un test cu bo por haci na fin di cada aña escolar. Esaki ta consisti den dos parti un ta test di teoria y e otro ta practico. Ora caba haci e testnan aki ta haya un diploma di A te cu C esaki ta den un transcurso di 7 aña pero por ta menos. Cu esaki si opta pa sigui un scol di musica conservatorio y e ora nos ta sigui duna e studiantenan di musica les”, Johnny Croes a splica.

Scol di musica Rufo Wever ta conta cu un total di 14 docente di musica cu ta duna les di diferente instrumentonan, te hasta les di canto y cu mas o menos 600 studiante. Di cual un total di total 115 studiante di musica a duna e presentacion di concierto diadomingo atardi.

Meneer Croes ta splica cu e studiantenan di cualkier edad cu a presenta ya caba ta prepara y dedica nan instrumento, E studiantenan aki a wordo prepara un periodo largo. E lesnan den scol di musica Rufo Wever por wordo duna den grupo of priva. 10 di september venidero scol di musica Rufo Wever ta celebra 65 aña di existencia na Aruba.