Update: Segun minister De Meza a extende e negociacionnan cu 6 siman pa yega na un ‘definite participation agreement’ riba 13 di mei. Diahuebs 31 di maart e ora nada a keda firma.
Gobierno no a cumpli cu su promesa algun dia prome cu Pasco (december 2015) pa cu fin di maart tin un acuerdo final cu Citgo pa habri bek e refineria na San Nicolas.
Bon Dia 24 a ricibi informacion siman pasa caba cu e negociacionnan lo no duna un resultado fructifero. Pero un di e miembronan di e delegacion cu ta na Merca pa negocia cu Citgo a comenta diaranson pasa cu ainda tabata negociando y pa diabierna 25 di maart tin mas claridad. Pues no por a conclui cu e deal ta ‘off’.
Pero diabierna no a bin e claridad. Den weekend minister encarga, esta Mike de Meza, si a declara cu lo yega na un acuerdo diahuebs e siman aki. Sinembargo, awe e minister a declara na NoticiaCla cu locual cu lo bay firma mañan no ta e acuerdo final cu gobierno a priminti na december. Segun e minister ta tuma algun siman mas tambe pa yega na un ‘definite participation agreement’. Locual tampoco ta un acuerdo final.
Pues te awor no tin un deal definitivo entre gobierno di Aruba y e compania Citgo pa por conclui cu lo habri e refineria definitivamente por lo pronto. Banda di esaki e doño di Citgo, esta PDVSA tin problema financiero grandi pa cu e prijs abou di azeta y diferente caso unda persona ta envolvi den corupcion.
