No tin cuenta anual… Y ken mester a controla…?

Recientemente a aparece riba website di CFT/CAft (cft.cw) un carta di CAft di 19 di januari 2021 unda e organo di supervision financiero ta anuncia na gobierno cu un gran cantidad di entidad gubernamental o semi-gubernamental no ta cumpliendo cu nan obligacion di suministra na CAft nan cuenta anual mas reciente. Esaki na e momento aki lo mester ta esun di 2019, pendiente 2020 den e proximo lunanan.

Mester bisa cu tin varios entidad ta ‘al dia’ cu nan cuenta anual, y ta asina pa hopi aña caba. Aparentemente nan si ta haya cu ta normal cu nan ta cumpli cu nan propio estatutonan cu ta prescribi cu den e siguiente aña, na determinado luna, nan mester tin nan administracion financiero di e aña anterior cla pa presenta, no na otronan so, pero na promer lugar na nan propio dirigencia. Esunnan cu no ta cumpli, y den cierto caso pa varios aña sigui, dificilmente por papia di un maneho drechi, pasobra nan ta fayando cu e principal requisito, unda bo mester por presenta bo estado financiero. Bo no por reclama por ehemplo cu bo estado financiero ta malo, anto bo no por bisa con malo pasobra bo no ta cumpli cu e exigencia di presenta cifra confiable, internamente y seguidamente tambe na gobierno y otro entidad externo. No mucho tempo pasa nos por a presencia e situacion na Serlimar, unda dunamento di cuenta tabata cana atras varios aña, pero si tur aña tabata vota den parlamento pa duna e compania aki subsidio, y ‘por arte de magia’ nan tabata sa di conta gobierno y parlamento exactamente cuanto miyon nan tabatin mester: a base di kico, con?

Hecho ta cu pa añanan largo tabata acepta y tolera cu cierto entidadnan no ta cumpli y no tabata tuma ningun medida contra esnan cu ta practica e mal administracion aki. Y si acaso un mandatario dicidi cu e ta bay actua, manera den e caso atrobe di Serlimar recientemente, ta castiga e mandatario y no esnan cu ta fayando den lo mas basico di nan tareanan pa cual nan ta ricibi pago… Naturalmente nos no mester ta asombra pa e situacion aki, pasobra en realidad tur e entidadnan cu ta fayando, ta di igual nivel cu gobierno mes, cu te recientemente tabata cana añanan largo atras cu dunamento di cuenta via elaboracion y aprobacion na tempo di cuenta anual, ademas di haci caso di recomendacion haci pa e organismo constitucional di control, cu ta Algemene Rekenkamer. Y pa cuanto gana cu hopi di nos tin semper di ‘zundra Hulandes’, si no ta pa e presion cu ta existi di nan banda, lo no tabatin ningun incentivo ni intencion pa cumpli cu e reglanan universal aki di bon administracion financiero. Ta realmente un berguenza cu ta e ‘mahamento Hulandes’ na e momento aki ta haci e diferencia, pasobra di nos propio ‘controladornan’ den parlamento poco por gaba cu nan a yega di reclama gobierno pa e trabao pober cu ta haciendo. Pa tur claridad, esaki ta e practica di gobiernonan, tur.

Mas ironico ta tambe cu loke mester exigi di tur e entidadnan aki ta locual den sector priva ta exigencia normal y gobierno mes ta exigi esaki tambe di tur compania, pa nan por duna cuenta pa loke nan debe na impuesto. Nos no ta puntra nos mes kico lo pasa den un compania priva si e director(nan) ta bisa e accionistanan cu nan no tin cuenta anual traha y por lo pronto tampoco tin intencion di percura pa esaki keda cla. Muy probablemente nan tempo como director lo a termina ey mes, y cu poco probabilidad pa gana caso den corte, pasobra como director bo no a cumpli cu lo mas sagrado di bo debernan. Pa referi atrobe na e caso Serlimar: esaki a pasa cu e ex-director ora el a bay reclama na corte su retiro pa ineptitud den gerencia financiero.

Esey ta trece nos riba e pregunta pakico anto for di gobierno no ta hiba un maneho mas estricto riba e entidadnan cu ta burla di nan debernan basico. E contesta obviamente ta den e hecho cu esnan nombra ta aliado politico, cu no mester di ningun otro cualificacion cu lealtad politico na e gobierno di e momento. For di e punto di vista di un politico: bo no ta caba di nombra bo ‘hendenan di confianza’ den e direccion y huntanan di comisario di e entidadnan aki, pa seguidamente baha pisa riba nan cu control pa cu nan gerencia. Naturalmente nos ta tende regularmente cu ta trahando riba un ‘Good Corporate Governance Code’ pa e entidadnan estatal aki, pero e afamado ‘transparencia’ di cual nos ta tende tanto propaganda, te awe no a mustra nos ni e cinco promer palabranan di tal Code. Ademas, di loke nos a mira na practica di nepotismo den e entidadnan aki, unda ex-amante o coordinador di un mandatario no tabata mester di mas recomendacion profesional cu e mero hecho cu nan tin relacion cu e mandatario, y cu e cosnan aki no ta haya coreccion, ta bisa nos suficiente di e actual situacion, unda palabra bunita no por encubri e realidad, y unda no ta tumando paso tampoco pa deshaci di e practica aki. Un bon conseho: no rabia cu CAft, pero cuminza coregi e cosnan aki.