No tin claridad riba ley pa legalisa cannabis medicinal

ORANJESTAD – E anuncio di minister di salubridad publico, Dangui Oduber, pa legalisa cannabis pa uzo medicinal, a causa reaccion y ta sigui causa reaccion. Esaki a pesar cu e tabata un di e puntonan cu a wordo inclui den e plan di gobernacion (MEP-POR-RED), a base di e programa cu partido RED a core campaña cune.

Un di nan ta bin for di parlamentario di oposicion, Michael Lampe, kende a declara cu na momento cu partido MEP ta dobla pa partido RED riba e topico di legalisacion di cannabis, ta mustra claramente cu e ‘tension ta hopi halto’ internamente den seno di gobierno.

Lampe ta haya cu e declaracion di e mandatario di salud no ta esun mas adecua rond di e topico controversial aki. E echo cu minister Dangui Oduber ta anuncia cu e ley pa legalisa cannabis ta un realidad, y cu nan ta bay haci esaki, y cu ‘tur cos ta cla pa haci esaki’. Pero e ta haya cu e maneho aki di gobierno no ta trece transparencia manera nan ta vocifera.

Di un banda, gobierno ta anuncia cu lo legalisa cannabi,s pero no ta anuncia con nan ta bay haci esaki. Tampoco nan a manda parlamento informacion necesario riba e ley aki, pa asina e miembronan di cada fraccionnan por pasa riba e ley y conoce mas di fondo con nan lo implementa e uzo di cannabis medicinal na Aruba.

“No tin niun detaye riba e maneho con nan ta bay haci esaki!” el a bisa.

Nan tin cantidad di pregunta rond di e legalisacion di cannabis, entre otro, con nan ta bay haci esaki y ki efecto e decision aki tin pa Aruba. Pero tambe e efecto cu e decision gubernamental aki ta bay tin economicamente, y ki sorto di investigacion a wordo haci.

Nan kier wak e investigacion cu a wordo haci, ya cu e partido di coalicion RED a yega di vocifera cu tin investigacion andando cu ta den su fase final. Sinembargo, segun Lampe, e dianan a pasa y nunca nan a wak e investigacion cu supuestamente a wordo realisa. “Nunca nos a wak kico ta e realidad tras di e maneho cu ta bay tin pa cu esaki,” el a bisa. E investigacion aki mester mustra e parti bon y e parti malo cu legalisacion di cannabis pa uzo medicinal ta trece cune pa Aruba.

E ta kere cu si e minister ta anuncia un noticia di e magnitud aki, e mester trece e claridad pa dilanti. Ya cu como gobierno nan trabou ta di trece transparencia manera nan mes a yega di priminti for di comienso.