(CuraçaoChronicle) – Den desaroyo recien, David Seferina, miembro di parlamento pa e partido Movementu Futuro Korsou (MFK) a expresa su preocupacion tocante e splicacion cu Curoil a duna tocante e reportahe unda a indica cu gasolin na Corsou ta di calidad abao, cual ta sigui bruha e comunidad.
Durante un programa unda a mira un debate entre maneho di Curoil y repoteronan, e compania a bisa cu e responsabilidad pa controla calidad di gasolin na stacion di gas ta den man di Bureau Telecommunicatie & Post (BT&P) segun e guianan existente. Sinembargo, Curoil a admiti cu e proceso aki di control no ta ser ehecuta efectivamente. Ademas, nan a admiti cu nan ta conduci nan propio test, sigurando cu nan ta cumpli cu e guianan 100 porciento. Sinembargo, BT&P ta bisa cu desde aña 2019 nan ta trahando pa implementa un “ley di energia” cu por provee un base legal na nan rol regulatorio pa asina impone sancion ora tin falta di cumplimento.
Considerando e declaracionnan cu ambos BT&P y Curoil a haci, aparentemente no tin un fundeshi legal pa conduci e controlnan necesario riba calidad di gasolin na e stacionnan di gas cu ta pertenece na Curoil y otro entidadnan priva cu ta bende gasolin na Corsou.
A base di e preocupacionnan aki, David Seferina a adresa un carta na Minister di Desaroyo Economico Mr. Ruisandro Cijntje, unda el a haci varios pregunta importante. El a puntra si BT&P tin e autoridad legal pa conduci control y impone sancion riba doñonan di stacion di gas y si esaki no ta asina, ken tin e responsabilidad pa e consecuencianan enfrenta pa e clientenan den termino di daño na vehiculo y perdidanan.
Adicionalmente, Seferina a pidi clarificacion riba e progreso riba e proyecto di ley di energia cu ta otorga BT&P autoridad como e curpa di regulacion y el a puntra tambe tocante e inclusion di e guianan nobo den e legislacion binidero aki.
