(NLTimes) – Tin tiki cas disponibel pa refugiadonan soltero na Hulanda, y mayoria di e refugiadonan pega den centronan di asilo mientras nan ta warda pa vivienda ta personanan soltero.
E cantidad di vivienda social no ta cumpli mes cu e necesidadnan di refugiadonan, kendenan ta solicitante di asilo cu a ricibi asilo y un permiso di residencia na Hulanda, segun NOS a reporta basa riba cifranan di e agencia central encarga cu e recepcion di solicitantenan di asilo COA.
E gobierno central ta determina cada 6 luna con hopi refugiado e municipalidad mester acomoda. Actualmente, esaki ta net mas cu 25,000 persona plama den e municipalidadnan Hulandes. Desde dia 1 di juli, casi 11,000 di nan te ainda ta bibando den centronan di asilo, wardando pa un cas. Esaki ta a causa di e escasez di vivienda y e hecho cu e casnan disponibel no ta cumpli cu e necesidadnan.
85 porciento di e refugiadonan cu ta wardando ta personanan soltero, aunke hopi di nan ta wardando pa nan famia uni na nan. Na mesun tempo, solamente 9 porciento di e vivienda social disponibel pa COA ta chikito y pues ta apto pa un persona soltero.
Mirando e escasez di vivienda na Hulanda, e municipalidadnan ta prefera no aloca e casnan di famia na refugiadonan soltero. Sinembargo nan no kier aloca e casnan di persona soltero si e refugiado lo mester bolbe muda ora su famia uni na nan. “Pa preveni cu tin un relocacion, e municipalidad y asociacionnan di vivienda ta prefera pone e famianan aki inmediatamente den un cas di varios persona. Parcialmente pa motibo cu e cantidad di casnan di persona soltero ta escaso,” vocero di VNG a conta NOS.
E analisis di COA a demostra cu tin un escasez di tur tipo di cas, incluyendo casnan grandi pa famianan mas grandi. Pa motibo cu e refugiadonan no por yega na un cas adecua, nan ta pega bibando den centronan di asilo, sin pro cuminsa nan bida na Hulanda y ocupando cama cu ta desesperadamente necesario pa e solicitantenan di asilo cu te ainda ta den e proceso.
“E ta frustrante pa varios hende,” vocero di COA a conta NOS. “Hopi biaha nan a pasa door di un procedura di asilo y kier cuminsa construi un bida na Hulanda y cuminsa integra. Esaki ta un desafio sumamente grandi pa e solicitantenan di asilo cu ta den e centronan aki ainda pega.”
