Siman pasa por a tuma nota di reaccion riba medionan social, den cual hende tabata keha cu nan no lo por a haci uso di e lama na Palm Beach dilanti oficina di polis, pa motibo di construccion di hotel nobo St. Regis.

Errol Sjak Shie di departamento di DIP a informa tocante e proyecto, cu ta tereno priva erfpacht cu a wordo duna ‘bastante aña pasa’ y no cu e ta un proyecto nobo. Sjak-Shie ta bisa cu locual a sucede ta cu gobierno nobo a aumenta e calidad di sector di turismo y trece un balans riba e desaroyonan cu tin riba tereno erfpacht mara na e grupo Marriott hotel.

Na prome luga tabata pa baha e cantidad di camber. “A sinta cu nan pa baha e cantidad, cu a logra bah’e di 308 pa 200 camber y 22 apartamento; y aumenta e nivel di e proyecto, cu tabata aproba timeshare. Gobierno e exigi pa calidad di un hotel di luho y no timeshare.”

E proyecto ta cambio pa mehoracion den e sector turismo y ‘no ta asina cu a duna tereno adicional’ of cu e beach a bay perdi, sino ta e mesun tereno cu ta den erfpacht caba. E proceso di e proyecto a cuminsa durante gobernacion entre 2000 – 2008.

Sjak-Shie a bisa cu na aña 2006 e proyecto a keda aproba y erfpacht a pasa, ‘pues e no ta algo nobo’. Pa e motibo aki a sinta cu esunnan cu a desaroya e proyecto pa baha cantidad y aumenta calidad.

A puntra toch si e construccion lo bay afecta e beach publico. El a contesta cu tin diferente facilidadnan cu ta keda eynan. Esey ta den e beach policy y te hasta haci e beach su forma mas amplio pa evita cu hotel ‘reclama derecho di e beach’. Sinembargo e beach policy no tin cambio y publico por yega na dje.

El e bisa cu tur e gazebo cu tin eybanda, si e ta bira mas accesibel pa publico, no ta bay bin cambio di uso y facilidad. Locual si ta bay haci cu beach policy ta keda implementa.

Nan garantisa e uso optimal y structural di henter e beach, manera ta poni. “E ta keda implementa y accesibel pa publico. Nan ta bay conoce cambio, pero nan no ta drastico pa hende y no ta stroba acceso. Y no tin facilidad publico cu lo wordo kita.”

Pa 14 aña cu e proceso a cuminsa cana su caminda, e ta bisa cu e ehecuta e proyecto cu minister anterior y pa motibo cu nan no a cumpli cu condicion erfpacht nan e pone presion cu mester cumpli y condicion mas estricto na caminda ‘cu ta substancial na nivel di prijs cu nos tin awo’.