(CaribbeanNewsNow) – No tin beach priva na Barbados, asina general manager di e National Conservation Commission (NCC), Keith Neblett, a bisa bon cla, enfatisando cu keto bay publico tin acceso completo na tur playa rond di e isla.
Comentando relaciona cu un disputa andando entre e management di Crane Beach Hotel y bendedonan ambulante riba beach, Neblett a bisa: “Bao di NCC Act Cap 393, beach ta defini como e tereno dilanti costa di Barbados y extendiendo no mas leu cu 33 meter di e limite di e linea di costa.” Sinembargo, el a nota cu tin momento cu e playanan ta bira mas hancho of mas smal, resultando den cambio den e limite di lama halto. El a splica cu unabes a establece e limite di lama halto, e ley NCC a defini 100 pia di e limite di lama halto bay aden como playa.
Pero el a indica cu a traves di añanan, cierto areanan manera Crane, cu un tempo tabata reconoci como un di e beachnan mas hancho na mundo, a bira mas smal. Como resultado, Neblett a mustra cu actualmente nan ta den e proceso di reestablece den e ley kico ta e beach publico.
Tambe el a nota cu e funcion di e ley NCC tabata pa controla, mantene y desaroya parke, hardin y playa publico na Barbados. Haciendo esaki, el a splica, bao di NCC a emiti tambe licencia na bendedo pa un gama di actividad, manera pa paña, joyeria, vlecht cabey, artesania, deporte acuatico, souvenir, huurmento di stoel y parasol.
“Durante añanan, e Comision a identifica areanan specifico riba beach unda e bendedonan por haci nan negoshi… Bo tin sitio unda tin paña y vlechtmento di cabey, nos tin bendedo situa directamente dilanti hotel”, Neblett a bisa.
Na juni aña pasa, e resort di Sandals, segun su public relations manager, David Hinds, a nenga cu e resort all-inclusive aki tabata purba di privatisa Dover Beach, a pesar di su borchinan, strobando persona cu no ta huesped, di bay riba cierto parti di e beach.
