Ayera Conseho di Ministro di Reino a yega na conclusion cu no ta necesario duna gobierno di Aruba un instruccion pa adapta nan presupuesto 2022. Esaki por a antcipa tambe, ora cu laat den e proceso ainda gobierno di Aruba a anuncia algun ahustacion cu a trece e deficit pa e aña aki na no mas di 112 miyon florin.

E ultimo conseho di CAft, duna na september tocante presupuesto complementario 2022, tabata encera un deficit di Afl. 84 miyon pa Pais Aruba. Cu un diferencia asina minimo no tin sentido pa bay pasa den e problemanan di un aanwijzing, cu no ta implica solamente un problema pa gobierno di Aruba, sino pa gobierno Hulandes tambe.

Duna un instruccion no ta simplemente skirbi y laga firma un decreto real, sino percura pa esun cu mester ehecuta e decision tin e staff completo cu mester pa haci esey. E ta requeri move personal Hulandes pa e tarea aki, mientras na Hulanda tur ministerio ta yena cu trabao, relaciona cu e problemanan cu e situacion economico y politico na Europa ta dunando. Pero e punto principal ta keda, cu gobierno di Aruba a percura pa nan ahustacionnan no a keda leu di loke tabatin riba mesa: Aruba a cumpli.

Esnan cu tabata desea, politicamente, pa Aruba haya un aanwijzing lo por a keda decepciona, pero nos ta kere cu mester contempla e tipo di suceso aki cu calma y sentido di humor. Al fin y al cabo, e conocedornan di e materia sa cu no tin scapatorio, Aruba no a ‘scapa di un desastre’, no, Aruba a preveni un situacion fastioso pa su mes y pa Hulanda, cambiando su rumbo financiero lo suficiente pa e spada no cay. Y asina e mester ta tambe; e posibilidad den e ley di supervision financiero no ta nada mas cu e ‘ultimum remedium’ pa e supervisor (Hulanda) pa obliga un isla, den e caso aki Aruba, pa cumpli cu e instruccion cu a haya caba, na momento cu a palabra algo. E acuerdo ey no ta algo cu por cambia segun ta conveni, e ta un obligacion. A tuma tempo pa nos politiconan custumbra cu esey y ta recomendable pa nan cuminza mira e aanwijzing pa loke e ta: e instrumento mas pisa cu e supervisor tin pa regla e asunto manera nan ta desea.

Claro cu tur esaki ta trece bastante emocion, y si e no tabata trece emocion, e politico local lo a invent’e. Ta pa hustifica dilanti di e votador local, cu loke ta sucediendo no ta culpa di e mandatario local, sino di e podernan ‘siniestro’ na Den Haag, cu ta nenga redondamente di mustra comprension pa e situacion local, cu lo ta asina diferente… E lamento di semper di e persona frustra, cu no por a topa sikiera cu un tiki comprension, mientras ta asina obvio cu e tin razon… Por ta cu enberdad e base politico mas fiel ta guli e tipo di argumento ey, pero segun cu hende ta mihor informa, ta bira mas dificil pa keda opera di e manera ey, y esey ta un bentaha pa nos tur.

Nos por bisa caba cu, compara cu e manera di actua na 2014, e forma con a atende e asunto di banda di gobierno di Aruba, a demostra cu nos politiconan por siña… E tempo aya, a bin huelga di hamber, a bin instigacion contra representante di Rey, a bin instruccion di parti di gobierno na e departamentonan pa no coopera cu e hefe di gobierno cu mester a percura pa ehecucion di e KB. Tur esey aparentemente no ta necesario, pasobra a comprende, net na tempo si, cu sigui riba e caminda di un aanwijzing no ta yuda, bo ta bay termina di tur manera cu e cambionan cu e supervisor kier mira. Asina bida ta.

Awor, nos por bisa: “Tur cos ta OK; borrón, cuenta nueva”? Esey no ta asina, y pa un motibo particular. Nos ta cay den repiticion aki, pero honestamente nos no ta mira tanto avance den e asuntonan di contenido. Te awor e aña aki tabata tocante placa; awor ta bira tempo pa papia, y actua, riba asunto cu no ta placa, sino kico ta haci cu placa. E hecho cu e reformanan, si acaso nan tuma lugar, ta tuma demasiado tempo, no ta perhudica Hulanda, e ta perhudica nos… Y hopi di e cosnan cu mester sucede, mester por conta cu un ambiente positivo di cooperacion. Esey ta parcialmente un realidad; unda ambtenaar Hulandes y Arubano ta topa, casi semper por papia di un ambiente propicio pa traha aden. E problema ta keda ora propuestanan ta yega na nivel unda politico mester tuma decision, y mas ainda ora e decisionnan ey mester haya nan follow up den ley nobo o cambio di ley. Aki ta unda e ambiente ta bira negativo, pasobra ningun politico gusta aproba asunto cu ta bay afecta su base votador. Sin embargo, nan mester comprende cu nan no ta den e negoshi di organiza carnaval, teniendo mas tanto hende alegre y contento.

Den e epoca aki, ser politico ta significa na promer lugar pensa y actua segun loke ta mihor pa nos comunidad. Y si a siña cu envez di hinca tanto esfuerzo y energia den bringa cu Hulanda tocante finanzas, ta mihor pa cuminza libra energia pa traha riba e sinfin di asunto cu mester drecha, anto nos preocupacion por cuminza mengua.