Tabata riba dia 1 di mei di e aña aki cu e acusado di inicialnan J.K. a topa un control di Cuerpo di Polis riba caminda, unda cu el a dicidi di aumenta e velocidad di su auto. Den esaki un polis a keda envolvi pa motibo cu J.K. a lastr’e aproximadamente 100 meter cu su auto, a dal contra un palo di luz y despues a huy for di e luga.
Ayera mainta un hues di Corte di Husticia a dicta sentencia den e caso aki, unda J.K a scuch’e via online deteni for di KIA. Ministerio Publico a pidi un castigo di 11 aña contra J.K cu tabata acusa di intento di homicidio contra un polis di 31 aña, cu a resulta gravemente herido.
Su abogado, Vito Carlo a duna un declaracion di e caso aki unda el a indica cu su cliente a wordo condena pa posesion di arma di candela, menasa y zware mishandeling, e acusacionnan di Ministerio Publico tabata cu su cliente a hacie intencional pa motibo cu ora polis a purba di stop e persona en cuestion, el a core bay y polis a keda wanta e auto.
For di dossier Ministerio Publico a bisa cu J.K intencionalmente a dal e polis contra un palo di luz, pa lo cual e polis a haya hopi sla y cu fiscal a bisa cu polis tin suerte cu e no a fayece.
“A base di dossier a mi tabata haya cu no tabatin suficiente indicacion cu en berdad mi cliente a haci’e intencionalmente y no tabatin e voorwaardelijk opzet”, Carlo a señala.
Un di e puntonan cu Carlo a trece dilanti ta cu e declaracion di J.K y di e polis ta contradictorio, tin un declaracion di un testigo y den esaki hues a tambe a bisa cu e auto cu J.K a cuminsa core e auto no tabata coriendo riba un linea straight y bay contra palo di luz, cu por a wak cu e auto tabata swing y segun esey tabata duna indicacion cu manera J.K den su declaracion a bisa polis tabata trek un banda di stuur wheel y J.K tabata trek e otro banda pa lo cual e auto tabata swing asina hopi, te cu el a dal contra un palo di luz y su cliente, manera el a sigura, e semper a bisa cu e nunca a wak cu e polis a dal contra e palo di luz, “pa e motibo aki hues a yega na e decision cu no tin suficiente prueba legal cu ta convicente cu mi cliente a tuma e riesgo di maniobra di tal manera cu e polis a dal contra palo di luz y consecuentemente cu e lo por a fayece”, Carlo a declara.
J.K a haya 5 aña cinco aña di castigo y no 11 manera fiscal di Ministerio Publico a pidi, ademas e mester paga un parti di daño y perhuicio di e victima, sino e mester sinta 84 dia extra.
Aworaki, e proximo paso segun Carlo a menciona, e ta bay sinta cu su cliente pa papia cune y asina wak si ta bay apela e decision di e hues of conseh’e pa wak kico e ta bay haci awor pa loke ta trata daño y perhuicio pa asina e victima por haya loke e tin derecho riba dje.
