CRUZ CORA 1 (1).jpg
 Diadomingo dia 20 di november ultimo desde oranan trempan Aruba a sufri di yobida fuerte cu tabata uno inespera. Esaki a trece cu ne hopi inundacion di cas y mayoria caminda a yena cu awa. Sra. Marla Thiel di Cruz Cora tabata encarga cu e parti di coordina e team pa mira e situacion rond Aruba. E partinan mas afecta di Aruba tabata Madiki, Playa Pabou y Palm Beach, pero esaki nan ta areanan cu ta wordo afecta normalmente.
 
A pesar cu e rioleringnan ta funciona, niun hende por pensa cu Aruba lo a haya asina un cantidad di awa den corto tempo. Sra. Thiel ta informa Bon Dia Aruba cu di e areanan cu a wordo afecta pe yobida fuerte, un parti so a tuma cierto precaucion, pero mayoria no.
 
No tabata tin aviso pe mal tempo
“Den e caso aki, no tabata tin un aviso cu lo bay tin mal tempo. Kiermen niun hende no a prepara,” Thiel a sigui indica na Bon Dia Aruba. Hendenan tabata lanta nan frishider poniendo esaki riba bloki of riba palo of mesa, lanta tur mueble cu por daña. Despues di e yobida Cruz Cora a drenta mas o menos 60 cas cu a yena cu awa. Nan a puntra e hendenan ki ora nan a haya sa cu awa ta bay yobe of con nan tabata prepara pe awa, tur tabata tin e mesun contesta. “Sra. den nos soño nos a cuminsa lanta paso e cama a cuminsa muha of mi a cuminsa sinti awa ta core den mi camber y mi a lanta. Of otro ta bisa ora mi a lanta pa bay baño pa 5’or mi cas tabata yena cu awa,” Thiel a sigui informa. 
 
Areanan afecta
Madiki, Playa Pabou, Palm Beach ta e areanan cu semper ta wordo afecta ora cu tin inundacionnan, pero e biaha aki areanan cu no sa pasa den esaki tambe a wordo afecta manera San Barbola y Paradera. “Savaneta tambe tabata tin. Esakinan ta e casonan caminda e hendenan ta traha un cas na unda tabata tin pasada di awa. Nan ta traha cura y nan no ta traha un buraco den e cura. Esey ta pone cu e casnan ta yena full, pasobra e cura ta traha vierkant traha cu bloki, kiermen e ta yena mescos cu un piscina y di pafo e awa ta bay paden di e cas”, Thiel a indica. “Den casonan aki polisnan mester wordo yama cu brandweer. Nan mester bin coba un buraco y basha par di bloki abou pa traha pasada pa e awa por bay.” 
 
Shelter
A puntra Sra. Thiel si nan a topa cu casonan unda cu hendenan no por yuda nan mes, por ehempel pasobra nan ta invalido of tin limitacion of problema medico. El a indica cu nan a topa cu cierto situacion, pero pueblo a yuda tremendo. “E parti ey mi ta bisa cu tabata tin hopi cooperacion. Famianan, bisiñanan mes cu tabata tin necesidad special of mester a sali for di cas, te hasta polis a yuda transporta nan for di e area damnifica, pa hiba nan na un cas di famia cu ta mas safe of un luga seco. E ora ey no tabata tin mester pa hinca niun hende den shelter,” el a informa. Tambe Sra. Thiel a informa cu tabata tin un shelter na Don Bosco na Noord. E luga tabata disponibel, pero no tabata tin e necesidad pa hende keda na e shelter pasobra hendenan a keda cerca amigo of famia. Segun Sra. Thiel hasta La Cabana hotel a pone 6 camber disponibel pa e famianan mas afecta, sinembargo esaki tabata solamente pa dos dia. Tin varios famia cu ainda no por drenta nan cas ya cu nan a perde basicamente tur cos.
Cruz Cora ta trahando riba un lista di kico tur e famianan aki a perde. Gobierno a haci un peticion pa traha e lista pa asina mira kico tur e hendenan mester di dje.
 
Heridonan grave
Bon Dia Aruba a puntra Sra. Thiel si tabata tin incidente nan mas grave cu por ehempel hendenan herida. El a informa cu no tabata tin nada mucho grave, sino hendenan cu tabata tin rasca chikito riba nan curpa pa motibo cu mester a haci lihe pa saca cos for di cas. Fuera di esey no tabata tin nada particular.
 
Conseho
Cruz Cora su conseho pa pueblo di Aruba ta pa ora bo traha bo cas cu bo cura, haci esaki conscientemente. Por ehempel si ta traha un cas cu cura den un area di pasada di awa corda traha cura cu buraco den dje pa e awa no tin cu para acumula y asina drenta hende nan cas