“No ta manera antes mas cu nos ta bira grandi, nos ta registra na SABA anto esey ta bay sosode. For di un investigacion cu a wordo haci a sali tambe cu nos grandinan ta prefera mas tanto pa keda cas ora nan bira grandi.” Esaki Lenny Geervliet, hefe na Departamento di Ouderenzorg na Directie Volksgezondheid ta splica Bon Dia Aruba den un entrevista riba con ta drenta un cas di cuido y e desaroyonan den e ultimo añanan.
“Pa un persona drenta un cas di cuido e ta naturalmente un procedura. Cada cas di cuido priva ta fundacionnan cu bo por acerca nan. Pero for di SABA nos tin un comision nacional di indicacion.” Via eynan te awe segun sra. Geervliet ta bin e peticionnan pa drenta Saba. E comision ta consisti di SABA mes, hende di hospital, ouderenzorg, departamento di Asuntonan Social. Nan ta bin hunto un bes pa luna.
Esunnan cu ta logra drenta un di e casnan di cuido di SABA ta bay eynan mes anto lo haya un formulario pa inscribi nan mes y entrega esaki bek na SABA. Nan ta haya un copia cu diferente puntonan pa entrega na departamento di Asuntonan Social.
Nan mester entrega esaki eynan pasobra trahadonan social ta bin cas e ora pa haci un entrevista y midi cuanto cuido mester. For di eynan tin un sistema di puntacion, depende na cual punto e persona tin pa por subi riba e lista. “SABA no tin luga pa tur hende na Aruba. Pues esunnan cu mester di mas cuido y cu ta mas urgente, ta bay logicamente via e sistema di punto. SABA ta realmente pa esunnan cu tin mester di cuido profesional.”
Luga na SABA
E grupo di hende grandi a crece asina hopi segun sra. Geervliet y e no ta asina mas cu tur hende por bay Saba. P’esey tambe tin e otro casnan di cuido cu por acerca nan libremente y evalua si eynan tin un bon balans. Esaki ta crea un tipo di balans manera nos ta compronde for di sra. Geervliet. Pero kico ta conseha esunnan cu ta aplica pa bay Saba y no ta haya luga? Sra. Geervliet: “Na prome luga semper nos ta evalua si tin un hende cu ta bini, papia cu e famia, wak si nan por carga e cuido pero partiendo tarea. No laga un hende so encarga pasobra e ta un tarea hopi biaha hopi pisa. Si abo ta e unico hende bo no lo want’e hopi. Laga e persona semper mas tanto cu e mes por haci su mes, anto percura cu e cuido ta pas cu e persona.”
Si e famia no por carga e cuido, tin e posibilidad di cumpra cuido manera cu tin via Wit Gele Kruis. E ta trabaonan di cas leve cu nan por bin haci cu prijsnan rasonabel. Tambe tin evaluacion social si e famia por carga esey financieramente, y si nan por cumpra cuido riba mercado priva, asina sra. Geervliet ta splica Bon Dia.”Esunnan cu tin awo peticion haci, esunnan cu ta participa na e trayecto, nos por spera cu nan ta ofrece un calidad aceptabel di cuido.”
Plataforma Nacional
Tin un plataforma nacional pa e cuido di nos grandinan cu minister di Salud a institui aña pasa. E ta consisti di tur instancia cu ta trata cu cuido di nos grandinan: Saba, Wit Gele Kruis, representantenan di casnan di cuido, Ouderenzorg, Departamento di Asuntonan Social.
Sra. Geervliet ta bisa nos cu e plataforma ta encarga di wak e necesidadnan den comunidad y sigui stimula cierto desaroyonan pa tuma luga den nos comunidad. Den e manera aki ta prepara Aruba pa e embeyecemento grandi cu tin. Nan ta reuni tur luna y for di e plataforma ta traha tambe den diferente gruponan di trabao pa e inspeccion di calidad y profielnan di cuido. Asina ey nan ta traduci eseynan den e trayecto pa cu e casnan di cuido.
Cuido na cas
Den e plataforma tambe tin un grupo di trabao cu ta traha riba ampliamento di cuido na cas. “No ta manera antes mas cu nos ta bira grandi, nos ta registra na SABA anto esey ta bay sosode. For di un investigacion cu a wordo haci a sali tambe cu nos grandinan ta prefera mas tanto pa keda cas ora nan bira grandi.” Pues segun sra. Geervliet ta conclui na Bon Dia, nan ta stimula pa e cuido tuma luga na nan cas mes, asina leu cu por. Pa esaki tambe tin cierto medida y accion pa wordo tuma. Por ehempel segun nos ta compronde for di sra. Geervliet, ta bay bin un proyecto pa amplia e cuido di Wit Gele Kruis na cas.
“Ta hopi importante pa ora cu tin un hende grandi na cas, e cuido wordo parti door di varios hende pa e persona por keda mas largo cu por na su mesun cas. Y tambe laga nos ta hopi consciente cu esaki ta un desaroyo cu ta tumando luga. Bo mester prepara bo mes cu un dia bo lo bira grandi y bo mester prepara bo mes pa cierto limitacion cu bo lo pasa aden.”
E departamento di Ouderenzorg ta conseha pa purba di move suficiente y come saludabel pasobra mas bo haci esaki, mas bo por bira grandi na un manera saludabel. “Cu den e manera aki bo por wak pa bo mes pa un tempo mas largo y keda activo den comunidad.”
