Departamento di Progreso Laboral (DPL) no ta wak diferencia of averahe grandi di personanan cu na masa ta bishita e departamento pa busca trabou.
Vocero y PR di DPL, sr. Richenel Stamper a declara na Bon Dia Aruba cu e cantidad di persona cu DPL ta bin hayando pa registra pa un trabou a keda practicamente igual. E cantidad di persona cu DPL ta bin hayando anualmente ta varia entre 1000 pa 1500 persona. “E no ta mas cu esey pa aña”, el a bisa.
Sinembargo si nos ta tuma e dato aki y compara cu e cifra di desempleo di alrededor di 7.5%, e no ta mescos, ya cu e ta hopi menos cu e cifra di desempleo. E ta bisa cu no semper e echo cu un persona ta na cas no kiermen cu e no kier traha.
“No ta tur hende cu ta na cas ta buscando trabou”, el a bisa.
Influencia mercado laboral
Sr. Stamper a referi cu esaki ta un percepcion cu no tur ora ta bay bon, caminda den medio di comunicacion di un banda ta wordo bisa cu e nivel di desempleo ta hopi; y di otro banda ta wordo bisa cu no ta hopi. Te hasta nan ta trece cierto porcentahe cu no ta cuadra un cu otro.
Pero e ta bisa cu e realidad ta cu no tur hende cu ta na cas ta buscando un trabou. DPL ta considera cu e hendenan sin trabou ta esun cu ta bin registra nan mes pa busca un empleo. Ya cu tin hendenan afo cu no tin trabou pero nan no ta bin registra na DPL nan mes como buscado di trabou.
“Nos no por conta bo e ora ey como un hende cu ta buscando trabou”, el a bisa.
Fei 2011 cu DPL a habri oficialmente te cu awe nunca a registra un cambio drastico den cantidad di persona cu ta bishita nan anualmente. Logicamente tin un influencia negativo den pasado ora cu refineria a cera. Pero tambe un influencia mas positivo tabata ora cu Ritz Carlton a cuminsa opera cu a absorba un cantidad di trahado na pia di trabou. Nan ta entre otro diferente aspecto riba e mercado laboral cu ta influencia riba cuanto hende ta bin DPL pa solicita pa trabou. El a trece como ehempel –si tur cos ta bay manera e ta bay- cu den futuro lo bay tin un aumento positivo di trabou pa loke ta apertura di e refineria.
Encuesta laboral
Encuanto e encuesta laboral cu ta tumando luga, sr. Stamper a bisa cu e tarea aki ta den man di Departamento di Labor (DAO). “E encuesta laboral no ta parti di DPL”, el a bisa. E ta agrega cu informacion concreto DPL no ta duna den e encuesta ey, ya cu departamento di Labor ta haci’e ariba nan mes.
E encuesta aki ta wordo haci a base di entrevista personal na cas di persona. P’esey e ta bisa cu e grupo di hende cu ta bay registra na DPL posiblemente tambe ta wordo entrevista via e casnan cu ta wordo bishita pa realisa e encuesta aki. Ya cu e grupo di persona cu ta wordo entrevista ta wordo scogi aleatoriamente.
A base di e cantidad di persona cu nan ta encuesta e ora ey departamento di Labor por mira un margen mas grandi di cuanto hende ta na cas of ki trabou nan ta buscando, etc. E ta haya cu e tipo di encuesta ta keda un cuestion di informacion, ya cu independientemente di e persona encuesta, nunca bo sa si e persona ey ta bisando e berdad si of no encuanto si e ta buscando un trabou. P’esey e ta bisa cu un encuesta laboral ta keda un proyeccion of calculacion di e situacion.
