Diadomingo merdia Bon Dia a wordo treci na altura di dos potret cu a cuminsa circula Facebook di un compania yama Palm Beach Divers caminda bo ta mira un persona cu dos baby tribon cu a wordo gara na Rodgers Beach. Bon Dia a comunica cu gerencia di Palm Beach Divers kende ta bisa cu no ta nan ta esun cu a pisca e dos tribon sino ta otro piscado.
”Mi tabata eybanda cu mi famia, nos a cumpra un Red Snapper for di e piscado y a mira cu nan a gara
dos tribon y nos a dicidi di saca un potret cu nan.” Sr. Roland ta bisa Bon Dia. Sr. Roland ta bisa cu no tin nada di worry di esaki anto ta djis un potret so nan a saca y publica esaki via di pagina di Palm Beach Divers pero cu nan mes no a mata e bestianan.
No ta tur especie di tribon ta protegi den nos region ainda
Segun Sr. Ivan Kelly di Polis Maritimo ta bisa Bon Dia, no ta tur especie di tribon ta protegi den e awanan di Aruba ainda. ”Segun ley, te ainda ta cierto tribon so ta protegi, kiermen no ta tur. Mastanto e Hammerheadsnan, bo tin tres tipo di Hammerheads cu bo ta haya den nos region, eseynan cu e tribon bayena ta esnan mastanto protegi. Cu mi ta asina leu cu mi sa no tin mas especie di tribon cu ta protegi. Mi a tende cu nan ta bezig cu algo pero e no ta concreto, dus esey nos tampoco no ta na altura di dje. Te ora nan no keda cla completo nos no por bisa kico ta kico.” Sr. Kelly ta splica Bon Dia.
