Banco Central a saca locual ta su ”Annual Statistical Digest” cual ta un documentacion importante pa pais Aruba den cual nos ta haya un bista riba kico a pasa den 2015. Segun Parlamentario Xiomara Ruiz-Maduro, e cifranan ta mustra con en berdad gobierno no ta paga SVB manera mester ta, no ta pasa placa di AZV manera mester ta treciendo problema den e fondonan ey cu despues ta bolbe hisa prima atrobe pa pueblo paga en bes cu nan a maneha e placa di gobierno na un manera responsabel.
”Den e rapport aki tin un variedad di informacion caminda bo por mira por ehempel kico turismo a significa na nos pais y tambe pa e Banconan kico esaki a significa den aña 2015 locual ta pa hipoteca, con nan ta para cu nan placa y interes cu a wordo duna. Pero pa nos ta importante tambe e parti caminda cu bo ta mira e cifranan di gobierno y den e caso aki mester bisa cu Banco Central a purba di aclaria cierto informacionnan di cual cu a bini, segun tabel di cifra pa locual ta bira e deficit di e pais” Sra. Maduro ta splica.
”Den 2011, e deficit tabata 325.2, den 2012 e tabata 443.3, den 2013 e tabata 332.8, den 2014 e tabata 405.8 y 2015 e tabata 201.7 anto cu buraconan asina grandi bo ta pone un presion enorme ariba bo financia publico, riba e cartera grandi y chikito” Sra. Maduro ta comenta. Sra. Maduro ta agrega cu esaki ta pone cu e debe tambe ta sigui crece y djis pa por ilustra pa pueblo por sa, for di 2011 e debe tabata na 61.4, es decir di cada 1 florin 61 Cen tin cu bay pa paga debe, na 2012 el a bira 67.6, na 2013 el a bira 74, na 2014 el a bira 81.9 y na 2015 el a bira 82.2. ”Pakico ta importante pa pueblo sa esaki? Pasobra ora cu di cada 1 Florin 60 cen caba ta bay pa paga debe, ya caba bo ta den un esfera caminda bo economia ta cuminsa tranca y como pais bo ta bay atras.” Sra. Maduro ta bisa.
P’esey segun Sra. Maduro, no ta coincidencia cu awe di cada 1 Florin 82 cen ta bay pa paga debe y no ta coincidencia cu Banco Central ta bisa bo tambe cu den 2015 e economia a crece cu 0.1%, kemen bo por bisa 0,0 e economia a crece cu segun Sra. Maduro e economia a tranca pa via di entre otro e debe cu a subi pues no ta resta placa pa cosnan importante manera educacion, combati criminalidad y tambe nos salubridad.
Sra. Maduro ta agrega cu ta exigi responsabilidad tambe di parti di nos institutonan cu ta haci e trabao di ”Checks & Balances” pa tene control ariba e pais akinan, sigur pa Banco Central pa e ora ey duna un conferencia di prensa of splica den un manera mas simpel pa nos pueblo compronde esaki. ”E lo tabata ideal si un conferencia por a tuma luga caminda cu e minister di financia ta sinta cu e presidente y ehecutivonan di Banco Central pa asina brinda e informacion aki, duna prensa tambe un chens di por haci nan preguntanan. Nos a compronde cu esaki tabata algo masha usual tempo cu tabata tin otro gobierno na mando, caminda cu e minister tabata sinta hunto cu e presidente y di biaha por haya contesta ariba e preguntanan cu bo tin.” Sra. Maduro ta comenta.
Nos no a wordo hisa, esey ta locual ta wordo bendi na pueblo
”Nos a wordo degrada ya caba na 2014, anto e degradacion ey a keda. Anto nan ta bisa bo cu nan ta premira cu cos por drecha pero pakico nan no a degrada nos mas?Pasobra nos a cay bao di supervision di CFT. Pa un pais manera nos cu un economia manera nos, di cada 1 florin tabata permiti cu entre 40 cu 55 cen por bay na paga debe anto awe di cada 1 florin ta 82 cen ta pa paga debe pues bo a pasa tur locual bo por a pasa caba anto p’esey nan ta bisa bo den e rapportnan cu Aruba ya no tin caminda di rek mas anto p’esey gobierno mester haci algo pa drecha esaki sino nos financia publico no ta manehabel mas, nos ta coriendo den un zona cora super peligroso. Pakico instancianan financiero no a degrada nos mas ta hustamente pasobra nos a cay bao di curatela di Hulanda anto si algo bay fout, e ora ey e instancianan ki ta bisa cu Hulanda lo cay aden y probablemente lo mester carga cu nos debenan” Sra. Maduro ta splica.
Sigur pa locual ta 2015, a trece dilanti caminda por mira e diferencia den deficit di e pais caminda cu gobierno ta raporta 98 Miyon como buraco den nos financia publico, y Banco Central ta raporta 201.7 Miyon pues e dobel di esaki. ”Ora nos a haya e cifranan aki, bo ta mira e ora ey berdad cu Banco Central a keda para na e deficit cu ta dobel mas hopi y mi ta kere e ta bon tambe pa nos djis repasa un parti chikito di 2011 pa 2015 pa pueblo por tin un idea di con grandi e buraco ta den nos financia publico. Ta importante pakico nos ta splica esaki pasobra esaki ta e cartera grandi di pais Aruba, anto ora tin un buraco asina grandi den e cartera, esey ta significa un buraco tambe den nos cartera individual y pone nos bay atras pasobra pa cera e cartera ey gobierno ta bay presta placa, pero esey ta pone e ora ey tambe presion ariba cu lo bini cu mas impuesto pa e por haya placa pa paga debe y cera e buraco akinan” Sra. Maduro a bisa.
