Ayera ariba nan pagina di Facebook oficial Bureau City Inspector (BCI) a publica cu nan a realisa limpiesa di veld di Pepsi Cola. Un localidad cu den pasado caba e bureau a haci limpi y cu un biaha mas mester di nan atencion pa motibo di hendenan cu no ta deshaci di nan desperdicio corectamente.
“BCI a ricibi yamada cu e veld di Pepsi Cola y bisindario un biaha mas ta yena cu desperdicio y mesora nos a manda un patruya pa haci nan control, y a bin encontra un cantidad di desperdicio ariba e veld di bala menciona y tambe ariba e ruta di e bario,” nan a indica.
Reportera di Bon Dia Aruba a tuma contacto cu vocero di BCI, Sr. Robby Rosel pa asina puntra si nan ta bay introduci otro medidanan, por ehempel camara, mirando cu esaki ta un localidad cu ya nan a yega di haci limpi den pasado, pa asina evita cu e ta bolbe bira un dump ilegal. A puntra tambe si tin algun idea di ken ta esnan responsable di tira sushi na e localidad aki y si ta bay parti boet.
Sr. Rosel a indica den su contesta cu en berdad ta trata di un luga cu a haci limpi varios biaha caba. El a splica cu nan ta trahando riba e posibilidad pa pone camara eynan, pero mester keda cla prome pa por haci esaki un hecho.
El a agrega cu pa por duna boet, nan mester logra gara e responsable of responsablenan di tira desperdicio eynan pa por duna un boet. “Si nos keda cla pa pone camara e ora sigur sigur boet lo wordo reparti,” el a remarca.
BCI ta haci pidi tambe den nan publicacion cooperacion di esnan cu por mira hende tira desperdicio ariba e area aki pa avisa BCI pa asina preveni cu e situacion aki ta ripiti den futuro.
E lucha contra e cantidad di desperdicio y dumpnan ilegal cu tin rond di Aruba ta algo di tur dia y desde e ciere di dump na Parkietenbos e situacion a empeora. Ainda no a logra implementa un medida concreto pa asina evita cu no tin tanto sushedad rond di Aruba.
Potretnan: Facebook Bureau City Inspector.
