Koningin Wilhelmina Fonds (KWF) ta anuncia su campaña pa recauda fondo 2017.  “Ora cu nos papia di recauda fondo ta pasobra KWF ta core cu gastonan basta halto, pa  no bisa hopi halto, na e momento cu nos ta duna asistencia na tur esunnan cu ta yega aki na porta di KWF pa un yudansa”, asina presidente di KWF Lilian Prince a declara ayera.

Inicialmente presidente di KWF a haci un yamada na tur organisacion social cu tin hoben adulto mayor di 18 aña pa nan yuda e fundacion aki. Ya cu den e permiso cu KWF a haya for di polis tabata para cu mucha bou di 18 aña no por colecta mas. Sinembargo tabata trata di un eror ora cu e permiso aki a wordo traha. Na momento cu e noticia a plama, Alto Comisario di polis Dolfi Richardson a tuma nota di e fout cometi y di biaha el a tuma contacto cu e fundacion aki.

Sra. Prince kier a pone tur hende na altura cu e coleccion ta bay manera e añanan anterior. Durante añanan muchanan cu presencia di un hoben adulto of un mayor ta yuda colecta; y e biaha no lo ta un excepcion tampoco. “Nos sa cu muchanan ta kibra curason di hende y nan ta colecta bon.”

                                                                                                                                                                                                             -Presidente di KWF Lilian Prince

E muchanan por colecta e aña aki, pero manera semper bou supervision di otro hoben mas grandi of den compania di nan mayornan, asina sra. Prince ta informa. E parti logistico no ta cambia tampoco. Nan ta colecta mainta, despues den ora di merdia nan ta sosega un rato y come algo, y atardi nan ta sigui colecta.

Gastonan ta subi keto
Na 2016 KWF tabatin un entrada di 408.703,29 florin. Sra. Prince tabatin palabra di danki na tur persona y empresa cu a duna nan donacion y aporte durante aña pasa, ya cu nan ta conta ariba donacion.  E donacion masha aprecia aki a duna oportunidad na KWF pa nan por a haci nan trabou, ya cu nan no tin patrocinadonan

Pero e gastonan ta sigui subi keto bay. Mientras cu nan tabatin un  entrada di  408.703,29 florin nan tabatin gasto di  410.438,20 florin, pues nan tabatin un deficit. P’esey nan ta sigui haci un apelacion na henter comunidad pa sigui sostene KWF.  Na luna di april KWF tin su tradicional accion di colecta cu ta cuminsa awe.  “Nos sa kico ta biba y reina den e comunidad aki. Ora cu e malesa yama cancer bati na porta. E no ta facil pa niun hende.”  Nan ta bay tin persona cu ta bay colecta durante dia 8, 22 y 29 di april. Riba 15 di april nan no ta bay colecta en bista cu ta Siman Santo. Tambe nan tin accion di colecta riba dia 6 y 13 di mei.