Director di Citgo Aruba, Raymond Buckley no ta kere cu e medidanan of sancion economico cu Merca a cuminsa impone riba Venezuela, lo tin un impacto directo y di biaha riba reapertura y operacion di e refineria na San Nicolas.
Aunke nan ta na altura di e posibilidad cu e lo por sosode, nan no ta premira nada na e momento aki.
Durante un entrevista cu Hits 100 Fm, sr. Buckley a laga sa cu a base di un combersacion cu e tabatin cu e oficina corporativo di Citgo na Merca, nan ta na altura di e tipo di sancion aki. “Nos ta sigui cu e meta.”
Sinembargo mescos cu den cualkier compania, si den caso algo bin dilanti, nan mester haci nan evaluacion kico e sancion aki por ta, pa traha un plan con nan por deal cu esey. El a indica cu Citgo ta un di e companianan mas grandi; nan tin tres refineria, y nan ta un di e miho organisa na Merca riba e tereno aki. P’esey e ta kere cu considerando esaki tur evaluacion lo mester tuma luga prome cu Merca ta bin cu un tipo di accion riba Citgo.
