Den conversacion cu profesionalnan den sector publico y priva, e discusion ta pasa riba e tema di eleccion y con esaki ta mustra pa e partidonan politico cu ta bay participa. Di e streanan nobo na firmamento no por bisa tanto, hopi ta bay depende di con nan ta presenta nan mes den e lunanan cu ta keda. Esaki naturalmente bao di e reglanan actual di proteccion contra coronavirus, cu no ta permiti evento publico cu un publico, ni grandi ni chikito. Hecho ta cu pa tur ta conta cu den e tempo nos dilanti no tin espacio pa priminti cos cu no por cumpli, pasobra e caminda di recuperacion pa nos tur ta smal y defini caba, esey ta obvio. Kico pa haci a pesar di e limitacion aki lo ta parti di e creatividad di e organisacionnan politico aki, di cual nos no a mira mucho ainda, di ningun banda. Por ta cu bayendo fin di september 2020 nos no mester spera tanto di esey tampoco.

Pero fuera di e cosnan na alcance di un politico pa declara, o priminti, manteniendo cierto credibilidad, tin hopi trabao, bao presion di e acuerdo cu Hulanda, cu mester sucede promer y despues di e fecha di eleccion, y cu lo ta parti importante di agenda di cualkier cu tuma asiento despues di proximo eleccion. Y lo ta trata hustamente di e cosnan cu te awor a keda mas scondi, y unda ta trata di e ‘clabonan’ mas grandi pa atende. E siman cu a pasa aki, nos por a tuma nota di djis un di e hopi temanan cu ta warda nos den e tempo venidero, cu ta e pone orden den e dunamento d cuenta financiero di un gran cantidad estatal, semi-estatal, y entidad cu ta ricibi subsidio y por lo tanto tambe mester responsabiliza nan maneho financiero. No tin otro manera di haci e cosnan aki di manera corecto, cu pone presion y tuma medida contra esnan cu no ta cumpli. Argumento di ‘pero gobierno nunca a puntra’ ta sin sentido, pasobra esun cu ta asumi responsbilidad den un puesto importante, mester ta asina educa cu e mes ta comprende kico ta su tarea legal den un puesto asina. Esaki ta bay trece hopi problema pasobra mayoria lo considera cu nan a tuma e puesto como un recompensa pa nan lealtad na e partido, y no como un responsabilidad publico unda tin responsabilizacion publico tambe.

E mesun metodo y mecanismo lo bay tuma lugar den e aparato publico tambe, unda responsabilizacion lo bira un termino clave, unda pa e ultimo 50 aña a reina e criterio di lealtad politico. Gobernacion lo ta obliga di bay mas den direccion di e forma di traha y disciplina cu ta comun den sector priva, y lo bay costa tempo, y hopi conflicto, pa logra impone un cultura di opera nobo den e aparato publico. Y manera a ser bisa na varios ocasion pa varios persona, ‘nos por keda sin hacie anto nan ta bin hacie pa nos’. Sin embargo, den tur esaki nos mester tuma na cuenta cu custumber malo no ta surgi solamente pasobra e despacho di un ministro ta exigi o stimula esaki. Tin cierto anomalia den e aparato a surgi a base di e poder cu cierto funcionarionan ta eherce a base di nan presencia y sobrevivencia di varios ministerio di diferente color, cu ta haci cu drecha e asunto no ta un cuestion di simplemente ordena desde ariba cu mester cambia e manera di opera. Pero ta importante si pa esaki cambia, pasobra hopi biaha ta e cosnan aki ta stroba un proceso mas fluido den gobernacion. Nos por a mira un ehemplo recientemente unda bao presion Hulandes a cambia LTU, pa facilita entrada di e funcionarionan Hulandes, cu pa hopi aña caba tabata cana un caminda di cruz pa haya nan estadia regla. Y esaki mientras no tin ningun motibo pa tarda cu nan papelnan, igual cu di hopi otro. Por a regla henter e asunto aki sin cambio di ley, y e cambio ey no ta garantiza tampoco cu e personanan aki lo haya mihor trato na e instancianan concerni…

Desde introduccion di e famoso LAR ta duna tur entidad gubernamental 6 siman pa contesta riba peticion di un ciudadano, y 6 mas si nan lanta cu mal beis, y ta dificil pa laga un funcionario comprende cu tin cos cu por atende den tres dia tambe: e periodo maximo a para bira e periodo minimo y a bira un estorbo enorme den gobernacion… Di e manera aki nos no ta mehora nada, y ademas ta tranca asina varios proceso cu ta clave pa funcionamento di nos economia. Esaki ta e cosnan cu mester cambiaden e asina yama ‘red tape’ cu no mester costa gobierno nada, pasobra por haci esaki sin kita ni pone ni mas hende, ni aparato; ta e voluntad y conocimento profesional mester t’ey.

Esun cu ta kere cu awor cu e Hulandesnan ta pone presion y nos dirigentenan ta obliga di cumpli, cos ta bay mehora, pa nos como ciudadano, lo ta mal ekiboca. No ta cuestion di haya dirigente di e pais aki comprometi na e cambionan; ta bay tin un bataya feroz pa caba cu e cultura di negativismo y falta di respet pa e ciudadano den gobernacion.