Recientemente, Aruba a celebra su Dia Nacional di Himno y Bandera caminda hopi actividad ta tuma luga rond di e isla, asina mes, tambe ta tuma luga cierto situacionnan cu no mag, manera a logra di capta den un potret.

 

 

 

 

 

 

 

Dia 18 di maart, tabatin celebracion y actividadnan tur caminda, den esey tambe por aprecia autonan y brommer dorna cu bandera di Aruba cu ta core rond di e isla, den esey un persona a manda na nos redactor e potret aki e cual ta ilustra un persona cu bandera ken a para su brommer y di otronan cu tabata hunto cune den un “style di parada” memey caminda strobando trafico.

Por mira den e potret cu nan a para rotonde di Aeropuerto y despues na rotonde di Ex-Condemsa pa asina ey laga tur e otro brommer pasa strobando e trafico pa brommernan so cu tabata coriendo den e grupo aki por a pasa, sin importa otro hendenan cu tambe tabata coriendo auto den area aki.

Pero tambe nos por compronde cu esaki a bira custumber tambe pa companianan operador di tours cu ta haci uso tanto di UTV como di ATV, unda nan tambe ta para memey rotonde, stop e trafico pa asina e vehiculonan aki di e compania di tours por pasa, strobando e trafico mayoria di biaha.

Redactor di Bon Dia Aruba a tuma contacto cu Cuerpo di Polis di Aruba pa puntra nan si den caso aki ta permiti pa hendenan para memey caminda y stroba trafico pa otro autonan por pasa causando un situacion incomodo na chauffeurnan cu hasta ta tarda basta tempo pa nan yega nan na destino, vocero di polis no a contesta e pregunta haci.

Consultando cu expertonan den trafico ya cu no a haya un contesta di Cuerpo di Polis, Bon Dia Aruba a puntra si ta bon pa permiti esaki caminda Thomas Ruiz di Vereniging Rijscholen Aruba (VRA) a contesta cu no pa motibo cu akinan nos ta papiando di dos articulo di Landsverordening wegverkeer y Landsbesluit verkeersregels e cual ta 2 y 27.

Nan ta señala cu ta prohibi comportacion den trafico di tal manera cu ta afecta e libertad di trafico sin necesidad, of si ta pone den peliger e siguridad, den caso aki ta trata di un crusada unda no tin un bon bista pa e chauffeur cu ta tras di dje por sigui e caminda, di tal manera cu ta restringi e libertad di movemento di otro chauffeurnan.

Mi ta para unda cu ta tambe ta na moda
 Den esaki nos redactor, un biaha mas, a topa cu un situacion cu pa cierto chauffeurnan specialmente taxi ta normal, akinan por mira e van blanco di taxi cu a para pa e por baha algun turistanan, di e forma aki strobando trafico tras di dje cu mester a pasa su banda pa por continua nan caminda loke ta pone den peliger e trafico mirando cu ta para den un crusada unda no tin un bon visibilidad y segun articulonan menciona caba, esaki tampoco ta permiti.

Pa loke ta haci un yamada na chauffeurnan pa bira mas consciente den trafico y no pone bida di hende den peliger innecesariamente.