Ayera mainta den un sentencia na corte, unda cu hues ta nenga peticion di Island Estate Reality NV(IE) cu a entama caso contra Aruba Birdlife Conservation (ABC) pa e tereno riba di Wetland/Bubaliplas, unda cu idea di IE pa construi un mall no ta sigui. Tambe e minister encarga cu medio ambiente Otmar Oduber (POR), a yama un reuda di prensa unda a papia di e veredicto y mas casonan andando.
Hues a tuma decision di nenga e peticion di IE unda e compania aki no por sigui mas cu nan desaroyo pa construi un mall. E peticion aki a wordo nenga a base iregularidad cu a tuma luga durante e procedura di peticion haci pa construccion pa e mall. Ta trata aki di un pida tereno cu ta cay den parti west di Wetland/Bubaliplas unda di 1/3 parti di e tereno aki a ser otorga na compania di Island Estate. E area aki ta ser considera como un area protegi pa ruimtelijk ontwikkelingsplan (ROP), un zona berde unda tin parhanan ta biba.
E caso ta cuminsa unda cu e compania esta Island Estate kier construi un mall cu luga pa parkeer entre Divi Phoenix cu Embassy Suites den cercania di Hilton Hotel. Unda cu e contra tiempo pa IE ta cuminsa; cu e construccion di nan mall ta cay den un pida tereno cu ta ser considera zona berde di Wetland/Bubaliplas.
Segun abogado Geert Rep cu ta representa ABC/Pais Aruba, ‘ta trata aki di un pida tereno cu tin un calculacion di mas o menos 5400m2 unda un parti di construccion a tuma un 1/3 parti di e tereno ey pa actividadnan di construccion’. Sr. Rep ta sigui bisa cu “IE lo tabata na altura desde 2016 cu nan lo ta construyendo den zona berde di Wetlands/Bubaliplas, pero cu lo ta trata di un pida tereno chikito den e zona berde menciona.”
Durante e zitting den corte, ABC/Pais Aruba a presenta e opcionnan di IE, pa motibo cu pais Aruba no lo sigui mas cu e desaroyo ya cu no lo ta duna erfpacht mas na e compania IE pa sigui cu e construccion. Aki ta unda IE ta entama un caso pasobra e intencion lo tawata pa presiona pais Aruba pa nan sigui cu e construccion, segun sr. Rep ta splica.
Bon Dia Aruba a busca un declaracion di parti Island Estate, pero no haya un declaracion.
Rueda di prensa minister
“No ta cuestion di persigui, ta cuestion di cumpli cu ley y regla”, tabata palabranan di minister Otmar Oduber.
“Manera conoci siman atras nos tabata cu prensa y nos a ilustra e situacion den e departamento di DIP y cu e proceso di tuma decision cu tabata tin pa un gran cantidad di tereno. Tereno cu cierto momento aki na Aruba a bira un procedura normal cu benta, negoshi tabata wordo haci cu terenonan aki. Pero pa locual ta trata e caso aki specificando tin un cantidad di contracto cu gobierno minister a firma particularmente, segun minister Oduber.
E minister ta bisa cu e hues a trece dilanti ta cu e minister anterior (Benny Sevinger) a actua contra ley y regla den su decisionnan pa loke ta trata e kiosconan (beach policies). Den e veredicto ta alinea cu den aspecto aki ta mustra cu minister tabata firma tur documento autorisando speransa den pida tereno, otorgando un tipo di permiso. “Practicamente un 90% di e departamento di DIP ta splica cu nan tabata practicamente pafo di henter e proceso di tuma decisionnan pa e ultimo ocho aña.”
Segun minister, e plan ta pa crea un gobernacion transparente, integro cu e comunidad di Aruba, pa tur hende sa nan derechonan y tambe sa cual obligacionnan ta pa pais Aruba, cual tambe ta conta pa departamento di DIP. “Mirando con e casonan ta bayendo den corte, pronto nos lo tin un departamento y organisacion cu nos comunidad por confia riba nan.”
