E mensahe central di Centraal Accountantsdienst riba e Fondo di Asistencia Social di Emergencia, FASE, ta cu e proceso tabata hopi deficiente. Y esaki a keda presenta na Parlamentarionan durante e tratamento di e ley di FASE cu a haya aprobacion di coalicion.

CAD a produci su rapport riba FASE sin por a logra tur informacion. Asina Centraal Accountantsdienst ta bisa den su presentacion di e investigacion cu a haci riba e pago di sosten di emergencia. E rapport di CAD ta data di September 16, 2021 y segun e ex-Minister pa Asuntonan Social y Labor, Glenbert Croes, CAD no tabata kier pa a publica e rapport, pero cu e mes a dicidi pa haci esaki den cuadro di transparencia.

E rapport a keda presenta na e Minister despues di adaptacion chikito a base di combersacion cu Sra. Sabine de Groot di e comision di evaluacion di FASE y Sra. Guissette Croes di bureau di Minister.

Los di e hecho cu no a ricibi tur informacion cu a pidi, CAD a detecta debilidadnan den e proceso di FASE, entre otro pagonan dobel, pago na personanan cu ya caba tabata ricibi sosten financiero di otro areglo, pago na personanan den servicio cu salario, personanan cu tabata ricibi pago di pensioen, personanan cu tabata traha part-time pero a ricibi e pago di FASE a base di un trabao full-time, ademas di continuacion di pago di FASE despues cu personanan a fayece of a emigra. Pero tambe a nota abuso y uso indebido di parti di personanan independiente (zzp’ers), personanan den servicio publico, y personanan cu ta brinda bienes y servicio na Pais Aruba (goederen en diensten, esta contractonan individual).

Motibo di e investigacion

CAD a haci su analisis ehecuta a base di articulo 9 di e Ley di Comptabilidad, pa duna e Minister di Asuntonan Social y Labor un bista riba si y con a sigui ley, pero tambe riba e maneho y proceduranan di FASE, e consecuencianan di e riesgonan y tambe recomendacionnan. CAD a mustra den su rapport cu e instancianan responsabel tabata e Minister, pero tambe e comision, y tambe Direccion di Finanzas cu a ehecuta e pagonan.

Un punto cu CAD a trece dilanti ta cu no ta a base di un tarea pa control di accountant y como tal no ta duna opinion riba kico e resultadonan ta nifica pa e totalidad di FASE. Como tal, esnan cu ta lesa e rapport mester haci nan mesun consideracion y evaluacion di e resultadonan.

E costonan di FASE y entradanan pa e fondo pa 2020 tabata 42.847.222 florin y 7.738.666 florin respectivamente. Pero e proceso, ademas di deficiente, no tabata inclui control efectivo pa evita inexactitud, abuso y uso indebido.

Controlnan no tabata efectivo

E proyecto di e proceso di FASE mes tabatin e mecanismo di control eficiente pa logra e meta. Den otro palabra, CAD a constata cu e proyecto tabatin controlnan na nan lugar. Aunke cu a aplica e controlnan consistentemente, CAD a bisa cu nan no a traha na un nivel optimal pa nan efectividad. Locual a demostra ta cu e controlnan ehecuta den e proceso di FASE no tabata efectivo. E hecho cu no a detecta anomalia of no a coregi esakinan, cu por trece e cumplimento na peliger.

Como tal, CAD a bisa cu mester trece mehoracion grandi pa limita riesgo, particularmente e riesgonan inaceptabel. E proyecto di proceso di FASE tabata deficiente y no a tene suficiente cuenta pa limita riesgo. Tabatin mucho poco of hasta ningun control riba e proceso, cu a haci cu tabatin anomalianan. Por ehempel, CAD a bisa cu e cantidad mensual di pagonan di FASE no tabata igual cu e cantidad di persona cu a haci peticion. CAD a constata varios deficiencia cu a trece inseguridad riba cuanto hende realmente a haci uso di FASE.

Un total di 11.622 persona a ricibi FASE. Pero e programa tin poco of informacion no adecuado pa exclui cu tin mas hende cu a ricibi diferente pago di FASE pa luna, pa motibo di a usa diferente number di identidad of persoonsnummer, cu ta aparece den e administracionnan, particularmente e PSA, cu ta personeelsysteem Aruba.

Verificacion di documento

No a exigi un documento usable pa verificacion corecto di esun cu a haci peticion pa FASE. E datonan, manera number di identificacion of persoonsnummer y otro documento fuente pa por identifica un persona, no por a keda usa. Consecuentemente, e comision di evaluacion a ricibi listanan di pago di FASE cu no tabata completo of hasta incorecto. Den e PSA a topa diferente hende cu a haya pago bao diferente number di identidad of persoonsnummer.

Pa e investigacion aki, CAD a usa dos punto di salida importante cu ta limita e investigacion na e fondonan cu a sali di caha publico. Como tal, e investigacion no a inclui un analisis si e peticionnan cu no a keda honra tabata inhusto of no. A scoge e punto di salida pa motibo practico. CAD a bisa cu na momento di a nenga un peticion pa FASE, e persona lo por a apela (red. ARA di su banda a mustra cu esaki tabata un di e deficiencianan grandi di e proceso di FASE, esta cu esnan cu no a ricibi FASE no por a apela e decision).

Cada decision riba un peticion di FASE mester a keda anota den un carta cu alabes ta e base pa pago for di caha di Pais Aruba. CAD como tal a sali di e punto di bista cu cada pago di FASE a sucede despues di un notificacion por escrito.

FASE tabata esencial, pero…

Pa CAD no tin un discusion riba e necesidad di FASE, mirando cu e pandemia a crea un situacion special cu a rekeri medida special. Pero circunstancianan special no ta nifica cu mester a duna man liber. Al contrario. Mester a usa medida di maneho y control adecuado pa e situacion pa evita y limita riesgo.

A introduci FASE na April 2020 pa esnan cu a perde nan trabao of entrada pa motibo di e pandemia y e condicionnan tabata hopi cla. E trahado a bay cas sin salario, e entrada a baha bao 950 florin, a retira e trahado. Ta a base di e condicionnan aki cu a haci e investigacion.

CAD a bisa cu falta di pruebanan di entrada, cu no tabata un condicion pa ricibi FASE, a aumenta e riesgo, y no tabatin splicacion pakico no a inclui e condicion aki. Pa CAD, FASE tabata pa percura cu ciudadanonan ta keda cu un minimo pa sobrevivi. Un prueba di entrada lo mester a mustra si e persona tin mas cu un entrada, sea di otro trabao of di pensioen. Ta datonan cu mester tabata registra na SVB of Departamento di Impuesto, entre otro. E falta di e condicion aki ta locual a habri e portanan pa un riesgo halto pa abuso y uso indebido di FASE. Como tal, CAD no ta sigur si a paga FASE na personanan cu realmente tabata afecta pa e pandemia y tabata menasa (completamente) den nan existencia. E otro motibo ta cu netamente pa motibo di un situacion financiero serio di Gobierno, lo mester tabata mas cauteloso cu fondonan publico.

Finalmente, CAD a bisa cu no obstante cu den futuro (den e caso aki e siman aki) FASE a haya su base legal, hecho ta keda cu e pagonan di FASE a bay contra ley di Comptabilidad di Aruba. “No ta pasobra e fondo ta riba Presupuesto 2020 ta nifica cu e tabatin base legal.”

Den un siguiente edicion lo amplia riba e problema di CAD pa por a yega na e expedientenan fisico. Den rednan social a circula nomber di personanan den servicio publico cu a pesar di nan salario di Gobierno, toch a cobra FASE. Entre e personanan ta inclui dos miembro di Cuerpo Policial. Aunke cu Minister di Husticia Rocco Tjon no a contesta pregunta si tin medida disciplinario pa e acto aki, Bon Dia Aruba a compronde cu a of ta cobra e suma back di e trahadonan publico aki. No a pasa pa retira nan, pa motibo cu a usa como argumento cu e casa (den un caso) a perde su trabao.