Nos a tuma nota di comentarionan cu ta keda bini dilanti relaciona cu
trucknan cu aparentemente lo ta pegando trafico ultimo tempo. Esaki segun comentarionan haci den comunidad riba entre otro programanan di radio, cu segun nan ta bini por medio di rutanan y orarionan cu trucknan ta core cual ta bay den conflicto cu fluho diario di trafico.
Recientemente nos a tuma nota di comentarionan cu a surgi den comunidad haciendo un apelacion pa cambio di orario cu trucknan ta core. Esaki pasobra aparentemente e ta bay den conflicto cu fluho diario di trafico mirando e rutanan alternativo tambe cu nan ta core, segun e comentarionan. E expresionnan den comunidad riba e tema di trucknan pa basta tempo ta entre otro pa chauffeurnan di truck tene poco mas cautela riba caminda riba cierto rutanan tambe cu nan ta core. Unda cu hopi biaha nan ta core hopi mey mey di caminda y core rutanan cu ta desaroya un mal custumber treciendo problema y peliger den trafico. Den un publicacion anterior di Bon Dia, nos a trece dilanti den un entrevista cu algun chauffeur di truck cu no ta tur chauffeur sinembargo ta core iresponsabel. E cooperacion mester den trafico mester bin di ambos banda segun e chauffeurnan di truck a yega di expresa. Hopi biaha nan mester core cierto camindanan pasobra no tin otro alternativa anto e camindanan ta hopi chikito.
Pero awor hasta hendenan kier wak si por cambia ley pa nan core parti di madruga pa no stroba trafico. Nos a acerca algun chauffeur di truck pa nan reaccion.
‘Aruba tin hopi auto’
Un chauffeur di truck contacto di nos – cu ta desea di keda anonimo – ta bisa cu e tema aki ta uno hopi fastioso. “No necesariamente ta trucknan loke ta daña trafico. Tin demasiado auto riba Aruba. Tin hopi hende tambe di mas edad ta core riba caya. Na mes momento bo tin hendenan cu ta bin di otro paisnan cu nan sistema di core auto ta diferente. Cu hopi biaha esey mi ta ripara ta causa cu trafico ta pega hopi,” e chauffeur ta splica nos. E ta bisa Bon Dia cu si lo kier bay cambia e orario cu nan ta core, lo mester pensa esaki bon. Pasobra riba ehempel di Waf so, e ta bisa cu lo mester bay cambia henter un sistema di opera pa nan traha durante oranan di anochi. “Anto e ora ey bo ta bay haya bo cu trucknan y container riba caminda den oranan laat di anochi of trempan madruga. Y nos tur sa cu esey ta e oranan cu hopi hende ta bula cu auto manera ta avion e ta riba caminda. Cu por costa bida di hende si bo dal tras di container di hende.”
Lanta mas trempan
E chauffeur ta sigui expresa cu ta prefera core den dia pasobra asina automobilistanan por tin miho bista tambe riba e trucknan, pero asina mes toch tin hende no ta worry. E ta bisa cu pa evita problema den trafico, e ta haya cu hendenan kisas lo mester lanta un tiki mas trempan y tuma un tiki mas tempo riba caminda. E chauffeur a sigui splica nos cu: “Mi ta kere esey lo evita hopi cos tambe. Pasobra tin cierto oranan di mainta por ehempel na Noord bo ta keda pega for di Giselle te ora bo yega luz di trafico. Y toch tin momentonan cu no ta asina. Pues no ta e echo cu truck ta daña trafico, pero mas bien e sistema cu nos tin di sali cinco minuut prome, nos kier yega toch na ora. Anto ora bo yega pega den trafico bo kier grita. Den cambio si bo a sali dies of diescinco minuut prome, bo ta riba bo rust y bo ta bay den trafico trankil sin pura y sin stress.”
