E presencia di barconan grandi cu a tira anker den nos plataforma maritimo teritorial bou maneho di departamento Maritimo a cuminsa causa cierto molester pa nos sector turistico. Director di departamento Maritimo, Sr. Carlyle De Coteau a declara na Bon Dia Aruba cu nan ta na altura di e situacion aki.
E ta compronde cu ta un “tiki fastioso” ora cu tin un barco pafo y bo kier saca un bonito potret di bahada di solo, ya sea dilanti di cas di hende, of na Malmok of for di cualkier area di nos isla. Pero nos mester corda bon cu no solamente nos hendenan ta biba di turismo, sino cu tambe tin cantidad di trahadonan Arubiano ta emplea den sector maritimo y nan ta ganando nan salarionan. Sino e barconan tin otro opcion den nos region pa bay y tira anker, sea na Trinidad of Corsou cu ta cerca di nos, sin cu Aruba por probecha di nan presencia den nos awa teritorial. Esaki ta e punto cu – segun director di departamento Maritimo – nan ta boga p’e.
Recientemente e departamento aki a entrega su cuenta anual na gobierno, unda den un studio preliminar e sector maritimo a contribui cu casi 25 miyon florin na 2015. Tambe e ta generando fuente di empleo, y actividad economico pa medio di e agencianan maritimo cu ta representa cada barco cu ta tira anker dilanti di nos costa. Pero tambe companianan cu ta realisa trabou di mantencion di boto. “E cosnan a cuminsa move akinan den sector maritimo”, el a bisa.
Sector maritimo y turismo
Segun Sr. de Coteau esaki ta e vision y meta di e minister di Transporte caminda e departamento Maritimo aki ta resorta, y kende tambe ta encarga cu e cartera di Turismo, Sr. Otmar Oduber. E mandatario kier lanta e sector aki como otro pilar di nos economia produciendo entrada pa nos pais Aruba. Un sector cu e mesun mandatario a yega di vocifera cu nos por desaroya sin problema pareu cu turismo manera a sosode pa basta aña caba. Pero e biaha aki e barconan ta contribuyendo y nan “no ta lanta bay” gewoon, segun Sr. De Coteau.
P’esey nan a bin cu cambio den nos legislacion, ya cu si nan no a cambia e ley pa cada barco tin su compania cu ta representa nan na Aruba, y cu cada dia cu nan ta anker den nos plataforma maritimo nan mester paga, nos no lo por a desaroya e sector aki cu ta dunando su frutanan economico. Antes e actividadnan maritimo cu tabata tumando luga pa basta aña dilanti nos costanan no tabata regula. E ta recorda cu un titular cu a sali den media ta bisa cu Aruba tin mas barco di petroleo cu Sur di Arabia pa motibo di e actividad aki. Pero el a indica cu personalmente esaki ta un honor pe, ya cu e departamento cu e ta dirigi a traha duro pa logra esaki. Ya cu cada un di e barconan aki ta nificando 160 mil florin directamente pa caha di gobierno, pero indirectamente e ta produci hopi mas den nos economia.
