Minister di Turismo Otmar Oduber no ta mira niun problema riba e cambio di orario pa establecimento nocturno manera nightclub cu ta opera den e zona hotelero di Palm Beach.
E medida aki lo drenta na vigor entrante awe caminda entre siman e establecimento nocturno lo cera mas tempran di nan orario habitual di 2or madruga den siman y 3or madruga den fin di siman.
El a bisa cu den e caso aki tin dos interes cu ta hunga un rol, un di nan ta esun di e comerciantenan di e area di Palm Beach pero tambe interes general. Un di nan ta e parti di siguridad cu segun minister Oduber ta un aspecto cu nan kier percura den e area turistico aki. El a bisa cu ta den man di minister presidente Mike Eman y minister di Husticia, Arthur Dowers pa papia cu e comerciantenan.
Encuanto si e cambio aki ta beneficioso of perhudicial nos sector turistico, e mandatario a declara na Bon Dia Aruba cu pa basta aña nan ta papiando riba e situacion cu tin den e area di e hotelnan. Tambe pa hopi aña tabatin keho no solamente di parti di e hotelnan sino di e usuarionan.
Di otro banda el a laga sa cu naturalmente nan no kier perhudica y tampoco elimina entretenimento of bida nocturno den e area aki. Pero e ta kere cu den e area ey, cierto momento mirando e cercania cu tin cu hotelnan, mester tene cuenta cu nan.
Bida nocturno na Playa
E mandatario a indica cu gobierno tin e intencion di desaroya e bida nocturno den centro di ciudad, y cu gobierno por duna incentivonan pa medio di orario mas largo, sin perhudica of molestia henter e area di centro di ciudad.
El a menciona e area di Weststraat y waf di crucero como esun potencial pa e actividad nocturno na Oranjestad. Nos inversionista ta haya un motivacion pa bin inverti den centro di ciudad creando un posibilidad nobo di atraccion pa nos bishitantenan, e mandatario ta bisa.
Minister Oduber a declara na Bon Dia Aruba cu el a ricibi un carta di mayoria di comerciantenan di e area aki cu el lo manda pa Conseho di Minister pa nan por discuti riba dje.
Di su banda e ta mira como un posibilidad grandi cu e area di Weststraat por haya e bida nocturno di antes, ya cu di un banda ta wordo elimina insiguridad cu por existi den e area aki, ya sea pa falta di iluminacion y di edificionan of lokaalnan bashi.
Tambe el a menciona e posibilidad di habri gate cu tin mas pariba di waf pa facilita e circulacion di turista crucero cu ta baha y subi e barco den e area aki den centro di ciudad.
E ta haya cu e tur e maneho aki ta sincronisa pa logra un miho experiencia pa e bishitantenan, entre nan esnan cu ta keda den hotelnan. Pero tambe den e caso di bishitante crucero cu ta wordo incentiva pa e barco aki keda mas laat y te hasta henter anochi na Aruba.
