No ta investiga…? E ‘soga’ na Hospital…?

Si nos mester kere representante di fundacion SOGA, “nada no a pasa y tur cos ta OK”. Nan tabatin un diferencia di opinion financiero cu e contratista principal, pero ya a strika tur e machicanan cu por tabatin y awor ta djis cuestion di termina e parti chikito cu falta y despues di casi 10 aña, nos tin un hospital completamente renoba. “Eind goed, al goed,” nan lo bisa na Hulandes?

Pa bisa berdad, nos no sa. Si nada no a pasa anto nos no por comprende pakico tabatin un panico y urgencia ora a resulta cu e contratista principal a subi avion y bandona Aruba, lagando e obra pa cual nan ta cobra centenares di miyon, sin termina. Asina leu cu nos sa, esey no ta e practica normal den construccion y un contratista asina lo por hay’e cu un caso den corte pasobra e no a caba trabao. Den e caso aki esey no ta asina, pues nos mester kere cu di banda di e fundacion tabatin cierto eror cu a haci cu e caminda di corte no tabata mustra un bon opcion. Kico esey tabata anto? Esey nos lo no haya sa pasobra a pesar di uso regular di e palabra ‘transparencia’ di parti di nos gobernantenan, ya nos por mira e promer señalnan di con e filanan ta cerando y probablemente nos lo por observa solamente e suma cu gobierno ta bay paga cada aña na huur… Pasobra esey tabata e sensacion cu nos tabatin despues di e presentacion demasiado positivo di e secretario di e fundacion, unda nos no a haya ningun vista ta cuanto e proyecto aki ta costando nos comunidad caba; al contrario ta crea e impresion cu esey no ta nos problema pasobra e gastonan no ta cay directamente riba gobierno… Con? Bisa un biaha mas?

Segun nos, esaki ta e triki bieu di e proyectonan ‘PPP’ unda gobierno na promer instante no mester inverti, pero e golpi ta bin despues. Den e caso aki tambe, ta durante tanto aña nos ta paga un suma considerable, cu sí ta aparece riba presupuesto di gobierno, pa amortiza e suma inicial, mas interes, mas gasto di mantenimento. Awor, lo bisa cu e gastonan ey ta inevitable, y pa un parti esey ta asina tambe, pero no completamente. Y ta ey ta unda ta tuma comunidad haci: e suma inicial, pa via di e forma mancaron con a entama e proyecto aki, cu tur su eror y incertidumbrenan, ta crea e plataforma ideal pa un prespuesto habri, ‘open-ended’, cu ta e precondicion pa corupcion dificil di detecta. Y ta net aki ta unda mester tabatin e maximo cautela y supervision, pa mantene e capital inverti mas limita posible, pa haci gasto di interes y loke finalmente nos lo paga, mas abao posible. Placa no gasta aki por ser usa pa otro cos util, asina simple.

Henter e proceso manera el a bay ta duna e impresion cu nos mester scoge: sea esnan cu a planifica tabata asina inepto cu nan no tabata sa kico nan ta haci, o nan ta asina ‘inteligente’ cu loke ta parce for di distancia ‘eror estupido’ ta realmente obra di arte di mente maligno pa gana placa. Djis pa menciona un detaye, cu a bin dilanti den e rueda di prensa tambe, e asunto di ‘meerwerk’. Tabatin oferta mas barata di e compania di construccion mas grandi di Union Europeo, pero descaradamente a scoge pa e contratista di origen dudoso aki, cu a cobra bon pa e ‘meerwerk’ cu tabata aparentemente prepara caba, supuestamente ‘pa eror’. Den ambos caso mester tuma medida na nivel gubernamental contra esnan cu a y ta maneha e fundacion, pero nos a comprende caba cu e mandatario mas envolvi ya no ta mustra tanto gana di bay haci algo. Igualmente den parlamento, ni di banda gubernamental ni di banda di oposicion ta parce di existi mucho animo pa investiga, pasobra e obra a surpasa gobernacion di diferente color politico, cu e consecuencia cu tur tin manteca riba nan cabez. Lo menos cu por a spera di parlamentario cu merece nan salario ta cu nan ta cuminza haci pregunta, y exigi claridad den e asunto aki. Te na e momento aki, sin embargo, ni sikiera esey ta sucediendo, mucho menos iniciativa pa investiga e proyecto di dilanti te patras, mucho menos como investigacion inicia pa parlamento. En todo caso, manera e situacion ta awor aki, no tin un panorama completo di loke e obra di renobacion ta bay costa finalmente, y cu esey no ta conoci tampoco loke comunidad ta bay paga. Contando interes – desconoci ainda – pa varios decada, nos por anticipa cu e gastonan total lo ta hopi mas cu mil miyon florin.

Awor, e proposito aki ta pa critica solamente e maneho den e caso aki? No, ohala esaki tabata e unico caso di e indole y magnitud aki; e daño lo ta relativamente limita ainda. E problema ta cu e no ta e unico caso grandi di aparente mal maneho cu consecuencia financiero grandi, banda di e casi seis mil miyon florin na prestamo di gobierno mes. Nos tin un peso grandi di e tipo di proyecto aki, cu ta facilmente come dentro di poco como cien miyon florin anualmente di gobierno. Hunto cu interes riba prestamo esaki ta bira mas di 300 miyon florin, manera un ‘soga na nos garganta’. Por cierto, un nomber cinico pa e fundacion aki, cu ta resultando un berdadero ‘bari sin bom’.