Mi hendenan! Nos ta bek den kikkerland. Cuero a cuminsa seca, cabey ta dof mane luz di un toyota. E curpa tropical ki a cuminsa tur sorto di protesta caba, pero mentalmente mi ta contento cu mi por descansa.
Zomer na Aruba tabata intenso, mi ta kere mi mester un aña pa recupera di tur locual mi a experencia den un tempo asina cortico. Algun tempo pasa mi a mira un pelicula yama “steel magnolias” pero e version mas nobo cu un elenco completamente componi pa hende di color. Mino por conta e plot completo pasobra esey lo tuma mucho tempo, pero den e pelicula tin un muhe cu tin cancer, e sa cu e tabay muri pero toch e ta opta pa casa y te hasta haya un yiu. Un persona ta confronte y cuestiona su escogencianan y e ta bisa e persona “I’d rather 3 minutes of wonderful, than a lifetime of nothing special”.
Mi ta draai e zin di tur manera, mi ta keda lesa. Keda analysa esaki y cuestiona mi mes. Personalmente, mi ta un hende muhe cu ta hopi enfoca riba tin un “mihor futuro” whatever that is really. E ta un tiki loco awo cu mi ta pense, paso e berdad ta cu no tin nada na mundo pa garantisa mi un miho mayan. Cu mi por a traha ayera, traha awe y aun asina no ta sigur cu mayan mi lo ta eynan disfruta locual mi a traha p’e. Bida ta algo asina fragil y e por cambia por completo di un dia pa otro. Henter ora mi ta worry, mi tin panico. Nunca misa necesariamente con pa laga los, pasobra mi tin miedo di consecuencianan. Esaki ta unda atrobe mino ta fit e stereotypo Dominicano. Dominicanonan cu ta asina conoci pa disfruta bida, pa biba pa awe.
Mi ta asina obsesiona cu mi futuro cu mi ta lubida di ta presente den mi presente.
Den mi anshamento mi ta bisa “no” na asina tanto cos incluyendo amor. Te hasta ora amor ta wak mi y primintimi cu e kier ta parti di mi mañan. Mi ta pensa ay pero mi ta na Hulanda, ay pero mi tin mucho soñonan pa alcansa, ay djies mi tabay haci internship dios sa na ki parti di mundo anto e ora kico cu amor? E no ta algo cu mi ta bisa cu orguyo, pero asina mi ta. Pero bosa kico esaki kiermen? Cu mi ta tuma presente for granted, cual riba su mes no ta algo bon tampoco.
Pasobra di berdad, tanto bal mi biba te 90 aña, sin nunca di berdad ta den e momento. Kisas e columna ta un tiki fuera di lo comun e siman aki, pero ami a reflexiona un tiki. Mi ta spera abo como lesado reflexiona tambe. Podise mañan por ta miho, pero si cos ta bon awe, what else matters? Den palabra di Jeon “bida ta un rato so”…
