E tema di Zwarte Piet ta uno cu ta keda bin bek tur aña caminda cu hasta tabata tin protesta atrobe na Hulanda e aña aki. Na Aruba un grupo a lanta aña pasa y habri un pagina di Facebook yama ‘Stop Zwarte Piet Aruba’. Nos a acerca nan pa un entrevista riba nan perspectiva di e asunto.

E dos persona tras di e pagina di Facebook Stop Zwarte Piet Aruba a opta pa keda anonimo mirando tambe e cantidad di reaccion negativo tras di henter e asunto aki. Nan ta conta nos cu nan a studia na Hulanda y durante cu nan tabata bibando eynan, e movecion ‘Zwarte Piet is Racisme’ a cuminsa.

Na 2011 e movecion a gara hopi atencion door di e detencion violento di Quinsy Gario, kende a protesta na un parada di Sinterklaas. “Nos tambe, mescos cu tur otro Arubano, a lanta cu Sinterklaas y Zwarte Piet for di mucha y nunca antes a mira nada racista na dje. Pero ora e movecion a cuminsa na Hulanda, nos a verdiep nos mes aden cu un mente habri. Nos a bin realisa cu e oponentenan sigur tin un punto,” nan ta splica.

‘Catibo di Sinterklaas’
Nan ta splica Bon Dia cu historiconan ta prueba cu e figura Zwarte Piet a wordo crea como un catibo di Sinterklaas. E prome buki cu Zwarte Piet ta aparece aden a wordo skirbi na 1850 por medio di Jan Schenkman y ta ilustra Zwarte Piet manera un esclavo, un catibo di cas.
E bistimento di peluca di afro, renchi di orea di oro, pintamento di lip diki cora y bistimento di e paña cu historicamente tabata wordo bisti door di catibo di cas, tur ta mantene e insinuacion cu Zwarte Piet ta un catibo, segun e grupo ta splica Bon Dia. “Es mas, tur pais civilisa ( cu excepcion di Hulanda) sa cu pa hopi aña caba no ta aceptabel pa hende cu no ta color scur pinta nan cara cu e color preto.

Otro puntonan
E grupo ta enfatisa cu tambe ta mustra claramente e aspectonan racista di e figura di Zwarte Piet. Por ehempel, na Hulandes e cantica Sinterklaas ‘Daar wordt aan de deur geklopt’, tin un letra aden cu ta bisa ‘Want al bek ik zwart als roet, ik meen het toch goed’. Pues e letra aki ta insinua cu en general hende preto ta malo, pero cu Zwarte Piet toch tin bon intencion.

Na 2015 Nacionnan Uni a declara cu Zwarte Piet ta racismo y mester wordo cambia mas lihe cu ta posibel. “Pa nos e argumentonan aki ta bisto y si hasta Nacionnan Uni a declara esaki. Ta obvio cu cambionan mester bin na e figura.”

Conscientisacion
Aña pasa ora nan a lanta nan a mira cu ainda ningun cambio a wordo haci pa cu esaki na Aruba, pues a start e pagina pa conscientisacion. “Nos no ta spera cu pa otro aña tur cos ta otro; na Hulanda tambe e movecion tin mas cu seis aña y awor numa e cambionan a cuminsa tiki tiki, ” nan ta bisa.

Nan ta sigui enfatisa cu no ta importa nan con exactamente e piet nobo su aparencia lo mester ta, basta cu tur e aspectonan racista y cu ta wordo asocia cu catibo wordo kita. Pues e peluca di afro, e renchi di horea di oro y lipnan pinta diki cora. Preferibel henter e pintamento preto ey tambe mester stop segun nan paso hende pintando nan mes preto caba ta igual na loke Merca ta yama Blackface. Hende cu ta pro Zwarte Piet semper ta insisti e ta preto door di schoorsteen, pues un posibilidad ta pa laga hende susha cara cu roet, sin tapa cada centimeter di nan curpa cu pintura preto. E grupo no tin ningun intencion pa organisa protestanan of instiga odio: “Nos ta kere den e poder di conscientisacion y combersacion. Nos no kier polarisa, sino simplemente laga hende pensa poco mas leu y asina logra cambionan tiki tiki.”

Otro ideanan
E grupo ta sigui bisa cu otro idea ta pa haci loke Corsou tin pa algun aña caba pa nan parada nacional. Cual ta nan ‘kleurenpieten’ den diferente color. Nan ta bisa e muchanan cu e boto a pasa door di un arco iris y p’esey awor tin kleurpieten. Mester ta duidelijk cu ta trata aki di un figura di fantasia segun e grupo y no un figura basa riba loke historicamente prueba pa ta un catibo y tampoco uno cu ta imita hende color scur. E grupo ta haya lastima cu hendenan cu no ta di acuerdo mesora kier tira palabra y menasa, siendo cu no tin ningun motibo pa bira asina emocional riba esaki. E intencion no ta pa stop e fiesta di Sinterklaas, e intencion ta pa ahusta esaki di un manera cu tur hende por disfruta di e fiesta.

‘Racismo inconscientemente’
E pio argumento cu hende por uza ta esun di tradicion of custumber segun e grupo ta opina. Hopi cos cu tabata antes tradicion awor no ta aceptabel mas, anto esey ta civilisacion. “Ta custumber tambe na Aruba cu hende ta papia di cabey bon y cabey malo; esaki ta nifica cu paso e ta un custumber pa bisa asina cu e no ta racismo?”

E grupo ta sigui splica cu hopi hende no lo bisa cu nan no kiermen nada racista ora cu na haci remarcanan asina riba cabey. Pero sin cu nan sa nan ta bezig ta implica y insinua cu tal tipo di cabey ta esun no desea. Racismo hopi biaha ta sosode inconscientemente segun e grupo ta splica, y den caso di Zwarte Piet, nan ta mira cu pa mayoria hende e ta algo inconsciente.

“Nos no ta di acuerdo tampoco cu e argumento cu mucha ta inocente y cu nan no ta mira color. Esey por ta berdad, pero hende grandi si sa miho y ta hende grandi ta insisti pa Zwarte Piet keda un caricatura racista. Mucha no lo tin ningun problema si cambia e piet pa schoorsteen of kleurenpiet basta cu nan haya regalo y mangel”, e grupo ta splica.

Tin mucha color scur cu ta wordo tenta pa Zwarte Piet pues cu un mucha no ta mira color simplemente no ta berdad segun e grupo ta subraya. Nacionnan Uni – ‘Convention on the Rights of the Child'(UNCRC) a declara e figura di Zwarte Piet contra derechonan di mucha y cu e ta promove tentamento, discriminacion y exclusion. “Cu algun cambio na piet nos por logra un fiesta cu tur hende por disfruta di dje sin cu ta promove bullying y discriminacion.”