No ta husto cu e pasahero mester bay sufri pa via di impuesto nobo

Chauffeur di Autobus Ronald Sint Jago:

Entrante juli crisisheffing 2.5% riba BBO y BAZV lo bira acumulativo un total di seis porciento (6%). E cambio aki lo por afecta entre otro esnan cu tin cu tuma transporte publico.

En berdad Aruba ta chikito y por bisa cu tur luga ta banda di otro pero ora no tin auto pa facilita esaki mester busca medio di transportacion sea autobus of Arubus pa por yega na unda mester.

Den e proceso di ley nobo di introduci e crisisheffing a pone cu e personanan cu ta haci uzo di diferente medio di transporte a cuminsa keha. “Mi ta gana poco mas cu salario minimo, mi tin cu paga huur, cuminda, awa cu coriente. Tur cos ta bay subi anto awo cu mi transport cu mi tin cu coy autobus tambe, no por”, un señora a comparti cu Bon Dia.

E medida pa hisa efectivamente e porcentahe cu consumido ta haya riba nan cobransa hunto cu BBO y BAZV no lo ta permanente, gobierno a aclara. Toch e lo tin efecto pa esnan cu tin un entrada menos satisfactorio. “Locual nos ta pidi di comunidad no ta facil, pero no tin otro forma”, asina prome minister a expresa riba dia di anuncio cu lo bin e crisisheffing.

“Si e chauffeur hisa nan prijs di bus chikito of cualkier medio di transporte legal e ora ey mas hende lo cuminsa busca modo ilegal. No ta tur ora cos ta dificil anto tin cu paga manera normal pero ora cuminsa bira preta mester busca un solucion. E solucion cu ta sali nos mas economico”, un ciudadano a remarca.

Mayoria a comparti e mesun comentario cu actitud disgusta pa motibo cu situacion lo bira piyo pa nan. Pa motibo esaki, nan a bisa cu nan lo mester busca e forma ilegal sea esun cu nan ta yama taxi pirata. E medida aki tampoco no ta cumbini e chauffeurnan di autobus. Nan tambe mester di placa pa biba.

Ronald Sint Jago, chauffeur di autobus a duna su comentario tocante e introduccion di e impuesto nobo aki. “Si sigui asina anto subi nos ta haya no mes obliga di subi nos prijs nan mas halto. Hopi hende humilde ta reclama. Mama dia famia ta yega cu tin tres yiu anto ta gana salario minimo.”

“Hopi ta depende di transporte publico, no ta husto pa nan cu tin cu sufri. E tarifa ta halto caba pa pasahero y awo ta bay bira pio. Nan ta reclama nos pero no ta nos ta subi prijs, ta gobierno ta esun cu ta dicidi pa e impuesto nobo aki”, asina sr. Sint Jago a splica.