Director di Stichting Slechthorende Aruba (FEPO) Sr. Wim Willems ta contento cu e cooperacion cu e fundacion tin cu Quota Club. Pa e director esaki ta uno bon y nan ta wordo yama pidiendo pa participa den e charlanan cu ta wordo duna na scolnan unda cu por duna informacion riba e problema di bira sordo, di no cuida oido y e dificultad cu tin pa nan biba den comunidad. Pero ta trahando riba un concepto di ley pa cu decibel, pero con pa implementa esaki mester pensa riba dje.
Quota Club a yama e fundacion puntrando si nan lo participa den e proyecto pa duna informacion na scolnan. Na momento cu nan haya invitacion pa haci presentacion na scol, nan ta mira ken por bay sea ta un representante di Quota of di FEPO. Segun Sr. Willems nan por bay henter aña na scolnan of instancia pa duna presentacion riba cuido di oido.
Ainda e decibel cu ta na 95 den carnaval ta basta halto. Pero ainda no tin un ley pa cu e decibel mester ta uno rasonabel. Ta ocupa pa traha un concepto pa adapta un cierto ley hunto cu departamento di Salubridad, y esaki ta casi cla. Pero awo e pregunta cu ta bin ta con por implementa esaki y esey ta un problema. Un zonido mester wordo midi y unda ta midi e zonido. Pa ley ta importante e distancia cu mester midi pa e decibel pero tambe ta importante na unda di haltura ta midi. Yen factor ta hunga un rol ora ta trata e topico di decibel. Tur cos mester wordo describi, na unda ta midi, con ta midi, ken ta midi, ki aparato ta midi. Nan ta ocupa e situacion di decibel y Sr. Willems ta kere cu nan ta casi cla. Pero tin cu pensa con ta implementa e ley si niun hende ta tene su mes na esaki no ta bale la pena.
Ocupa cu campaña
Henter aña Quota ta ocupa pa bisa hendenan cuida nan oido, pero nan enfoke principal ta carnaval y e evento di “Shatter Silence Week” cu ta tuma luga na september. Den e evento aki hendenan por yega eynan y controla nan oido por nada di cual FEPO ta organisa na esaki. Eigenlijk esaki ta e dos enfoke principal pero durante henter aña Quota tambe ta duna atencion na esaki.
Reaccion positivo
Na momento cu nan ta bishita e scolnan, ta mira cu e participacion di e muchanan ta uno positivo. Esaki ta bin pa motibo cu e presentacion ta wordo varia y e muchanan ta haya esaki masha bon. Ora cu ta mustra nan con e zonido ta y con e zonido ta na cierto distancia, e muchanan ta reacciona den un forma positivo. Pero loke Sr. Willems no sa si e muchanan ta haci uzo di e informacion cu ta wordo duna. Aunke cu nan ta tene charla pa muchanan, tin biaha nan sa tene charla pa adulto. Aña pasa Aruba Bank a organisa un charla di oido pa su empleadonan y despues di e charla, algun trahado di e banco nan oido a wordo getest.
Musiconan mes ta admiti decibel ta halto
Aña pasa durante e “Shatter Silence Week” e musico Claudius Phillips y un DJ a pasa na e evento pa controla nan oido. Pero e realidad ta cu masha tiki di e musiconan ta yega na e fundacion pa controla si nan oido ta bon ainda. Durante e test a saca afo cu e musico su oido tabata aunke cu e tin hopi aña den e mundo di musica. Tin musico cu ta controla nan oido ta bisa cu e zonido ta mas duro cu 100 decibel durante henter e parada.
