– Departamento di Higiena como un departamento cu ta resorta bou Departamento di Salud Publico ta realisa trabou di control pa salvaguardia salud di nos pueblo. Un trabou cu nan ta realisa tin di haber cu e control den santana. Cada momento cu mester habri un graf unda a dera un difunto, personal di Departamento di Higiena ta presente, ya cu nada por tuma luga sin nan supervision.
Yvette Geerman kende ta directora di departamento di Higiena cu awor a conoce otro nomber, Dienst Warenkeuring en Hygiene, den cuadro di su 80 aña di existencia, a bisa cu nan tin supervision na momento di habrimento di graf, pa saca e resto di e difunto, segun peticion di nan ser keri. Nan ta duna conseho si e luga of graf cu ta deteriora ta anti higienico.
Ley di cremacion
Aunke mantencion di santana ta cay conforme ley bou Ministerio di Asuntonan General. Pero Departamento di Higiena ta hunga un rol ya cu nan ta supervisa e ordenansa cu tin di haber cu reglanan di santana. Entre nan con e graf mester ta traha, un famia no por saca e resto prome cu tres aña, etc.. E ta un ley anticua pero vigente cu mester wordo adapta. Esaki tin algun punto di atencion di Departamento di Higiena, ya cu otro ley nobo a bin acerca cu ta e ley di cremacion na Aruba. Nan ta supervisa e proceso aki y tambe nan tarea ta esun di supervisa ora cu cremacion ta tuma luga.
Locual ta falta
Sinembargo e ley a keda introduci, pero ainda tin aspecto di e mesun ley cu no ta wordo ehecuta debidamente. Sra. Geerman ta declara cu su departamento tambe tin un tarea of rol cu cumpli cu ne. “Nos tin un momento pa supervisa, pero ainda ta falta.” Ainda tin parti cu mester pone den ehecucion di e ley di cremacion. E ta agrega cu nan tin cu supervisa, pero tin gasto envolvi. “E ley a pasa caba solamente e parti di e rol di nos na mes no ta activo ainda manera debe ser.” Pues e ley di cremacion ta activo den cierto partinan pero no completamente.
Plamamento di shinishi
Otro punto tin di haber cu independientemente di doctrina di Iglesia riba deramento di shinishi di e difunto na sitio sagrado manera santana. Departamento di Higiena tambe ta bin confrontando e pregunta si e plamamento di e shinishi den lama, riba tera of na laira, ta contra di salud publico. Ainda riba e parti aki no ta existi un maneho concreto riba dje cu ta prohibi pa ehemplo di tira e shinishi den lama
Tambe nan ta haci supervision ora cu nan ta move e restonan, sea di un graf pa otro of di un santana pa otro. Tambe nan ta hunga un rol pa traha rapport conhuntamente cu Comision di santana pa e parti di mantencion di e graf. Un santana cu e departamento aki tin basta atencion riba dje riba materia di salubridad publico, ta e santana na Zeewijk. Pero considerando cu e santana aki ta uno publico, e no tin un comision cu ta supervis’e locual ta haci e situacion mas dificil.
