Despues di mantene un silencio hermetico pa basta dia, porfin a bin un contesta di director di departamento di Infrastructura y Planificacion riba e preguntanan cu Bon Dia Aruba a haci, tocante posible emision di tereno, cu segun fuentenan directamente envolvi, tabata mustra riba posible rebenta di tereno erfpacht, den cual transaccion tabatin un suma grandi envolvi. Tur esaki segun e compania den exterior cu mes tabata gaba di nan adquisicion di e compania na Aruba, cu lo a haya mas di 40 hectare na Aruba pa agricultura, incluyendo cultivo di cannabis.

E contesta di e director ta cu su departamento no por discuti caso individual; esaki pa respet pa privacidad di esnan envolvi. Esey ta zona bastante fair, y nos tincomprension tambe pa e argumento aki, pero te un cierto punto. Nos por comprende cu durante cu un caso, un peticion di cierto tipo, ta den tramite ainda, ta mantene e asunto confidencial. Esaki ta practica normal den gobernacion, unda ningun ciudadano tin derecho ni acceso na informacion tocante peticion cu un ciudadano ta haci. Pero… unavez e proceso termina, y resulta den un permiso, por ehemplo, o den e caso aki den e emision di un tereno pa cierto uso, e asunto ta cambia. Pakico? Pasobra un di e registronan publico mas importante ta esun di ‘Vastgoedregistratie’ (registro di bienes inmobil) unda pa ley e emision di e erfpacht ey mester keda registra, y ta accesible pa tur ciudadano. Esey ta implica cu automaticamente un ciudadano por haya tur informacion di tur tereno na nos isla? Si, basta e tin hopi placa. Esey pasobra e registro no por duna un persona tur su informacion riba un solo peticion. Informacion di e registro ta structura di tal forma, cu ta duna e ciudadano un extracto (uittreksel) di un parcela determina di cual e ta desea informacion. E registro no tin obligacion di duna informacion di forma mas masivo y sigur no segun deseo di un individuo. Esaki ta conta tambe pa otro registro publico. Ora bo bay e registro publico di persona (Censo), bo ta topa cu regla bastante estricto pa proteccion di informacion di otro hende, cu consecuencia cu bo por haya bo informacion personal den un extracto, cu identificacion adecuado, pero no ta duna bo acceso na informacion di otro persona. Igualmente bo no por bay na Camara di Comercio y exigi por ehemplo cu di ‘tal persona mi kier haya un lista di tur empresa cu e meneer aki tin interes aden’. Loke si bo por haya ta tur informacion cu ta publico, tin un parti cu no ta publico, riba un peticion individual di cada empresa. Aki tambe bo mester tin un dineral si bo ta desea di haci research pa bo mes.

En todo caso, nos por sigui argumentacion di e director, te cierto punto. Pasobra e pregunta di Bon Dia Aruba tabata si a emiti 40 hectare na e tal compania local ey si of no. Si e tereno ta emiti, e no tin pakico di sconde pasobra e informacion ey ta parti di e informacion riba cual e ciudadano tin derecho. E negacion di un contesta afirmativo ta haci cu nos por supone cu no a dduna e tereno (ainda) o a duna e tereno caba, y ta investigando e caso, pasobra ta nan obligacion pa investiga ora un instancia serio, y nos ta considera nos mes un medio serio, trece dilanti informacion cu por indica un continuacion di e practica cu a haci tanto daño na nos pais, esta di tuma tereno practicamente pornada di Pais Aruba, y seguidamente bende esaki pa miyones. Nos tin algun caso grandi y bergonzoso pa nos pais den tramite hudicial cu ta inclui dos ex-mandatario, y nos sa tambe cu no a bin cambio legal pa cera e buraconan den ley pa preveni cu e practicanan aki ta continua. Si den un caso asina, di gran interes publico, ta haci e pregunta si a emiti tereno, anto den su papel di dunador di informacion e por a bisa ‘Si’ si acaso esey tabata asina. Si e asunto tabata den tramite ainda, e por a bisa cu e no por duna informacion di un caso den tramite ainda, pero e no a bisa esey tampoco.

Por lo pronto nos ta keda cu e situacion cu nos no por haya informacion den e tipo di caso aki, que sea asi. Pero nos no ta lubida, y nos ta sigui investiga. Y no pa djis satisface nos curiosidad, aunke esey no tin nada di malo den periodismo, pero pasobra ta nos tarea y razon de ser pa busca y duna informacion cu nos ta considera necesario pa publico en general. Y papiando di interes general, pueblo di Aruba tin derecho di tende, no solamente con ‘malvado’ esnan ta cu a comete e practica delincuente aki den pasado, pero kico por spera di e actual gobierno, kico ta e pasonan pa tuma pa preveni continuacion di e practica. Den esey e apreciable director no por sconde, pasobra no ta trata di caso individual, pero di maneho general pa cual e y su ministro ta responsable. Na nan pa indica kico lo bay bira maneho futuro den e asuntonan aki. Nos no a tende nada ainda di nan banda, pero nos ta keda gentil y pacientemente pendiente…