Dia 1 di september ta e fecha stipula pa e maneho nobo pa loke ta trata traspaso di permiso di taxi drenta na vigor. Desde anuncio di e cambionan aki e grupo di taxistanan a expresa nan malcontento y preocupacion, a bay den accion di protesta pa exigi minister di Transporte, Ursell Arends, revoca e maneho nobo. E fecha stipula ta acercando rapidamente y ainda no tin un acuerdo entre e taxistanan y minister Arends.

Manera ta conoci desde cu minister Arends a anuncia e cambio di maneho na comienso di luna pa loke ta trata traspaso di permiso di taxi y aumento den e cantidad maximo di pasahero cu un vehiculo di taxi por transporta, e situacion ta tenso y e tension ta aumentando cada dia mas mirando cu e fecha 1 di september ta acercando.

E taxistanan ta para firmemente contra e maneho nobo y ta exigi minister Arends pa revoca esaki prome cu e drenta na vigor. Ya caba e taxistanan a realisa dos dia di protesta na comienso di augustus, locual tabatin efecto grandi den diferente sector.

A pesar cu e taxistanan a reuni cu minister Arends na varios ocasion pa purba yega na un acuerdo, esaki ainda no a logra y e taxistanan ta evaluando nan opcionnan, y no ta descarta tampoco e posibilidad pa mas accion di protesta, pa asina logra nan obhetivo.

Recientemente e taxistanan a reuni na veld di Bubali pa delibera kico ta bira nan siguiente pasonan. Segun e portal di noticia Aruba.nu a reporta un grupo grandi di taxista a reuni y a mustra nan malcontento cu e plannan di gobierno. Javier Harms, un di e taxistanan presente, a enfatisa na e portal cu e taxistanan ta uni den nan resistencia contra e MB di e minister.

“Nos no lo permiti cu e medidanan aki ta tuma luga,” Harms a declara na Aruba.nu. “Nos manera di biba ta riba liña, y nos ta dispuesto pa sigui lucha te ora e plannan aki ta wordo cancela”

E portal ta indica cu pa reforsa nan mensahe, e taxistanan ta considerando e posibilidad pa tuma pasonan legal, mas accion di protesta y eventualmente hasta un welga. “Nos lo lucha pa nos derecho y no lo stop te ora e minister scucha nos preocupacionnan,” Harms a bisa Aruba.nu.

E taxistanan ta haci yamada na gobierno pa establece dialogo y busca un solucion cu ta proteha tanto nan interes como tambe e interes publico.

Un di e problemanan cu e taxistanan tin cu e minister y e cambio di maneho ta e falta di comunicacion. Algun taxista ya caba a indica anteriormente cu nan no tabata na altura di e cambio aki, nan no a wordo informa ni consulta, pues no tabatin ningun dialogo cu nan tampoco, locual pa nan ta inaceptabel teniendo na cuenta cu e cambionan aki ta afecta nan recurso di bida directamente.

Ademas di esaki, e problema principal di e taxistanan cu e cambio di maneho ta e eliminacion di posibilidad di traspaso di e permiso di taxi pa nan familiar of persona di escogencia, algo cu tin hopi añas ta tuma luga y cu a bira un custumber caba.

Di su banda, minister di Arends a enfatisa cu un di e motibonan principal pakico e situacion ta caminda cu e ta, pakico a tuma decision pa introduci un maneho nobo ta varios acto di corupcion cu e ministerio di Transporte a logra intercepta pa loke ta trata traspaso di permiso di taxi den e ultimo temponan.

El a splica anteriormente cu mester a tuma e decisionnan aki pasobra mester bin cu mas control pa loke ta trata reparticion di permiso y tambe den e cantidad di asiento, considerando e tipo di turista cu Aruba ta ricibi, segun e propio taxistanan mes a indica.

El a remarca cu e cambio di maneho ta para e traspaso di permisonan entrante 1 di september 2024 y combati e benta ilegal di esakinan. Asina por stimula un sistema mas husto y transparente.

E minister a indica cu otro motibo di e decision aki ta pa crea oportunidad igual pa ciudadanonan por yega na remarca pa un permiso, na luga di mantene e situacion cu hopi permiso ta keda circula den e mesun gruponan, limitando e oportunidad igual di otro ciudadanonan pa yega na remarca pa un permiso di taxi.

Considerando e articulonan 3 y 15 di e “Landsverordening personenvervoer” minister Arends a dicidi cu, den anticipacion y sperando un ahuste di e “Landsverordening personenvervoer,” peticionnan pa traspasonan basa riba articulo 15 no lo ser permiti mas entrante 1 di september.

E regulacion di e minister pa peticion pa traspasonan menciona den articulo 15 di e “Landsverordening personenvervoer,” di 26 september 2022, lo ser retira entrante dia 1 di september 2024.

Peticionnan pa traspasonan di permiso haci prome cu 1 di september 2024 lo ser trata conforme e regulacion di 26 di september 2022 cu ta vigente te 31 di augustus 2024.

Apart di e cambio di maneho pa elimina traspaso di permisonan di taxi, minister Arends a emiti tambe un decision ministerial tocante e cantidad maximo di asiento den vehiculonan di taxi.

Conforme articulo 1, introduccion y parti D y E di e “Landsverordening personenvervoer,” un taxi por ta ekipa pa transporta no mas cu cinco persona, sin inclui e chauffeur. Esaki ta nifica cu e vehiculo di motor di un titular di permiso di taxi por tin maximo seis asiento.

Tin e necesidad pa taxistanan transporta mas cu cinco persona, vooral si ta trata gruponan grandi di turista kier tuma mesun taxi hunto.

Teniendo na cuenta esaki, minister Arends tin intencion pa ahusta e “Landsverordening personenvervoer” pa aumenta e cantidad di asientonan permiti y cantidad di personanan transporta di cinco pa shete, sin inclui e chauffeur.

Departamento Transporte Publico ta bay ta encarga cu e control di cumplimento di e cambionan aki. Den caso cu no cumpli loke ta prescribi den e decision ministerial aki prome cu 1 di october, cual ta e fecha di entrada di e maneho nobo aki, ta cu e permiso lo ser revoca temporalmente pa 30 dia.

Si un titular di permiso di taxi ser sorprendi un di dos biaha cu un vehiculo di taxi ekipa cu mas di shete asiento, sin conta esun di e chauffeur, e permiso lo ser revoca temporalmente pa un periodo di nobenta dia. Y si e titular di e permiso di taxi ser sorprendi un di tres biaha pa e mesun cos, e permiso lo ser revoca permanente.