Bon Dia a puntra Parlamentario Sra. Xiomara Ruiz Maduro si henter e asunto di otorgacion of ”fiesta di tereno” ta algo cu tin di haber cu politica pa locual e ta contesta cu esaki ta bay hopi mas leu cu e color geel of berde. Akinan ta papiando di mal gobernacion y mal maneho pa locual ta asunto di otorgacion di tereno pa motibo cu tin hopi hende ta warda pa tereno aki na Aruba y ta mustra manera un circulo di hende ta haciendo negoshi cu terenonan publico.
Segun Sra. Maduro ta splica Bon Dia, ta asina cu Minister Sevinger mes tabata bisa cu tin 11.000 peticion pa tereno anto e di baina por a duna 600 tereno pasobra no tin tereno. ”Tabata tin hopi reclamo di hendenan cu a perde nan huurgrond. Pa añanan e huurgrond ta den famia, sea cu nan a planta riba dje of no, gobierno a kit’e for di nan anto Minister Benny Sevinger a bisa cu esaki ta ”inkeerregeling”. Kiermen, paden nan ta kita huurgrond pa por duna tereno pasobra tin scarsedad di tereno. ” Sra. Maduro ta splica. For di eynan a bin un parti por ehempel, empresario Venezolano Sr. Roberto Rincon a haya tereno den menos cu 3 dia el a haya un acuerdo for di Minister pa e haya tanto meter cuadra na Barcadera segun Sra. Maduro ta splica Bon Dia. For di eynan a bin tambe e casonan dilanti di hues caminda cu Minister Benny Sevinger a perde pasobra cu e ta cambia destinonan di tereno sin cumpli cu ley. ”Nos a pidi un reunion dia 17 di Januari caminda nos a haci un peticion na presidente di Parlamento pa yama un reunion na locual ta pasando akinan riba e parti di otorgacion di tereno pero tambe cambio di destino di tereno caminda cu for di un ”woonwijk” ta haci di nan ”comercieel” y mientrastanto e reunion aki ainda no a wordo yama.” Sra. Maduro ta bisa.
Ta haciendo negoshi cu tereno publico?
Segun documentacion cu ta biniendo, Sra. Maduro ta bisa cu nan ta wak cu un solo famia di cual nan sa ta liga na AVP den e caso aki e famia liga na Sra. Leoncita Arends. Sra. Maduro ta bisa cu nan ta mira cu e famia a cuminsa haya tanto tereno anto e manera cu nan ta haci esaki ta pa lanta diferente compania, haci peticion anto ora cu nan ta haya firma di minister dus haya un ”opcion”, nan ta core bende e tereno akinan anto traha placa riba esaki. Kiermen nan ta specula cu e tereno akinan y a mira cu por ehempel hasta parlamentario a haya tereno, den e caso aki parlamentario Melvin Tromp, di cual el a bende esaki tambe. ”Corda bon, gobierno no ta duna bo tereno pa bo bay haci negoshi cu ne. Vooral den un situacion caminda tin tanto peticion pa tereno aki na Aruba, tin hende cu tin añanan ta warda pa tereno. E hendenan aki ta indica na nos cu bo ta mira enbes cu bo tin cu bay Departamento di Infrastructura (DIP) anto haci bo peticion pa e wordo trata, aworaki hasta nan kier pa bo bay na Minister Sevinger pa saca cifra cu ne pa e ora eynan wak si bo ta bay haya esaki si of no.” Sra. Maduro ta splica. Sra. Maduro ta comenta cu esaki a bira un manera pa sigura voto, pues politicamente uzando esaki pa determina si bo por haya tereno of no, den otro palabra limitando oportunidad igual pa por pidi un tereno. Pues si bo no ta AVP of ta liga na e famianan cu tin mas ”prioridad riba un otro”, bo tin menos chens pa haya tereno segun Sra. Maduro ta splica Bon Dia. ”Akinan bo ta mira cu tin un ”netwerk” cu ta profita di terenonan publico anto bo no por permiti e cosnan aki pasa den ningun gobernacion pasobra den e manera aki ta refleha como si fraude ta algo bon. Nos mester como pueblo rechasa e tipo di practicanan akinan y no participa ni tampoco cera wowo pa nan. E ta un obligacion di nos sigur como parlamentario di un pais pa trece e cosnan aki pa dilanti anto busca manera pa debidamente investiga esnan cu ta culpabel di e echonan akinan.” Sra. Maduro ta splica Bon Dia.
Parlamento no ta move
Tin un peticion cu a drenta parlamento caba for di Januari hunto cu 4 recordatorio segun Sra. Maduro pa trata cu e asunto aki debidamente. ”Tin motibo pakico parlamento no ta move, e presidente di parlamento ta ex minister di infrastructura cu den su tempo AVP a lastr’e constantemente pa asunto di tereno, pues awo cu e no ta den AVP kisas e tin miedo pa yama e reunion. Tambe, e vice presidente di parlamento, su mesun casa ta e directora di DIP cu ta otorga e terenonan aki. Nos no tin prueba di esaki pero nos a compronde cu e señora aki lo ta e secretaria pa e partido AVP, kiermen den un situacion asina nan no ta yam’e. ”Sra. Maduro ta comenta.
Como partido di oposicion, Sra. Maduro ta bisa cu nan ta evaluando seriamente e documentacion cu nan tin den nan desposicion pa asina e ora eynan pidi un cita cu Procureur General pa wak e ora eynan kico ta e pasonan cu Ministerio Publico ta bay tuma akinan. Mirando cu tur e cosnan aki ya caba a wordo publica, Ministerio Publico riba su mes tin un autoridad di haci un investigacion. ”Mi ta spera cu e investigacion ta pa wak e rol cu e Minster y esnan rond di e Minister a hunga akinan. Pasobra riba e email cu a wordo publica por mira claramente cu for di paden caba e asuntonan aki ta wordo regla. Esaki no por.” Sra. Maduro ta bisa.
