Tin indicacion cu rond mundo e virus cu ta causa e malesa Covid-19, SARS-CoV-2, a conoce mutacion. Asina fuente New York Post ta indica cu cientificonan di Iceland a descubri cu e virus den e pais ey a conoce mas cu 40 mutacion bou e poblacion infecta. Riba pregunta di Bon Dia, Babette la Tour, representante di Asociacion di Specialista na hospital a contesta cu te ainda no ta conoci ki mutacion ta presente na Aruba pero si cu e informacion aki lo ta importante durante e desaroyonan nos dilanti.
Maske e estudio aki no a wordo mira pa otro cientifico den veld medico, Allen Randrup Thomsen, virologo na universidad di Copenhagen, ta bisa cu esey ta coincidi cu loke ta conoci caba di e virus. Esey ta pasobra ta conoci ya caba di informacion di China cu e virus ta conoce mutacion rapido y agresivo. Na China un estudio di luna pasa a indica cu tin 2 tipo di Coronavirus cu ta infectando su poblacion, un mas agresivo cu e otro.
La Tour a conta Bon Dia cu no ta conoci ki tipo di mutacion di e SARS-CoV-2 ta presente na Aruba, pero cu si ta mustra cu rond mundo tin varios mutacion, of si por yama nan asina, variacion. Mientras e virus aki ta desaroya na Aruba, la Tour a indica, lo ta importante pa monitor esaki. E representante pa tur specialista na Aruba a indica cu siguramente esaki lo ricibi su debido atencion di acuerdo cu e desaroyo.
