Durante e conferencia extraordinario cu a tuma luga diadomingo ultimo na Bureau Rampenbestrijding Aruba (BRA), a surgi un punto di preocupacion acerca di e cuater persona residencia na Aruba cu a bin for di China. Nan a bin e mesun dia ey abordo di un avion cu a sali for di Schiphol (Hulanda) pa nos pais.
E preocupacion tin di haci si e personanan abordo por a core e riesgo cu nan lo a wordo contagia, si wordo descubri cu e cuater personanan tabatin e virus di Coronavirus. Actualmente, manera minister di Salubridad Publico, Dangui Oduber a anuncia, e cuater persona aki procedente di China ta den cuarentena pa dos siman na Aruba.
Hefe di departamento di Malesa Contagioso, Sharline Koolman a splica cu e malesa produci pa e virus aki ta hopi nobo y tin informacion nobo cu ta sali constantemente. Pero te aworaki informacion oficial ta, cu durante e periodo di incubacion, prome cu e sintomanan ta manifesta su mes, ‘por ta na comienso e por pega,’ el a bisa. Sinembargo no ta confirma ainda cu e ta pasa durante e periodo di incubacion ey. E periodo di incubacion di e Coronavirus ta alrededor di dos siman.
Koolman a bisa cu e criteria cu ta wordo uza pa considera un persona potencialmente sospechoso di Coronavirus, ta: E persona tabata den e area di Wuhan. Otro cu e persona tabatin contacto cu otro persona cu tabata na Wuhan y cu tin sintomanan. Te aworaki, Organisacion Mundial di Salud (WHO) no a cambia e criteria ey. Pais Aruba lo sigui mantene e criteria ey te ora cu tin mas dato epidemiologico cu eventualmente ta duna bo espacio pa por cambia e criteria ey.
