Ayera mainta Minister di Transporte, Naturalesa, Integridad y Asuntonan di Adulto Mayor, Ursell Arends a tene un conferencia di prensa na unda a brinda un actualisacion pa loke ta e iniciativa di baki den bario y a elabora tambe ariba e datonan di esaki te cu aworaki.

E iniciativa di baki den bario ta parti di e campaña di conscientisacion Limpi Limpi cu ta den su di 11 luna di implementacion di e maneho di desperdicio responsable.

Minister Arends a remarca cu ora a cuminsa cu baki den bario den luna di september, a cuminsa ta colecta un total di cinco tipo di desperdicio y aworaki a subi esaki na ocho tipo di desperdicio cu ta wordo colecta.

“Comunidad di Aruba ta respondiendo grandemente na separa desperdicio anteriormente, prepara na cas caba pa ora cu mester deposita esaki, pa e bay mas smooth cu ta posibel tambe,” el a indica.

Actualmente e baki den bario ta sucede tur diasabra, ora cu a cuminsa cu e iniciativa aki den luna di september y october e tabata sucede cada pasa dos siman y desde cu luna di november a cuminsa, e ta sucediendo tur diasabra y lo continua te cu 16 di december.

Minister Arends a enfatisa cu e meta di baki den bario ta pa stimula e habito di separacion di desperdicio den comunidad y e aumenta e cantidad di materia cu ta wordo colecta pa asina di e forma aki e por wordo recicla y procesa debidamente.

El a splica cu segun datonan desde e prome baki den bario, cu excepcion di e prome baki den bario na San Nicolas unda cu no a conta e cantidad di autonan, te cu aworaki tin un total di 3048 vehiculo cu a bishita e actividadnan di baki den bario, un total di 480 baki a wordo usa pa e actividadnan aki y esaki ta yega na un volumen di alrededor di 100 ton pa cada baki den bario. Te cu aworaki pa e 480 bakinan cu a wordo usa, a colecta 673.87 ton di desperdicio.

E mandatario remarca cu bulkwaste ta e cantidad di desperdicio cu mas hopi a ser colecta te cu aworaki. Esey, el a señala, ta brinda e perspectiva cu mirando den bulkwaste tin diferente otro tipo di desperdicio cu por wordo separa mas ainda, manera por ehemplo plastic.

El a agrega cu for di e datonan cu tin colecta ta indica cu den e casi 406 ton di bulkwaste cu a wordo colecta tin espacio y tin oportunidad pa mehoracion pa separa mas aun pa asina e materialnan aki por wordo converti den materia prima.

Pa loke ta trata e ultimo tipo di desperdicio cu a wordo agrega na e lista, esta azeta di cushina usa caba, Minister Arends a indica cu mirando cu den e ultimo dianan tin hopi reclamo y enfoke ariba e problematica cu tin na RWZI, el a splica cu tin un comision cu ta atendiendo cu esaki cu ta consisti di varios departamento di gobierno cu ta atende e tema aki mirando cu tin reglanan estricto, tanto pa hotelnan pero tambe pa restaurantnan y trucknan di cuminda rond di e isla ariba con ta atende cu e azeta di cushina usa caba.

El a sigui splica cu lamentablemente esaki ta wordo manda den e sink y esaki termina den full e sistema di riool y RWZI cu ta crea problemanan pa e funcionamento tanto di RWZI y di e sistema di riool y esaki ta pone cu e motornan ta bay for di servicio y mester mantencion adicional.

“Pesey nos kier haci un yamado na comunidad di Aruba, pero tambe na e sector comercial, sector priva, pa ban atene nos mes na e reglanan aki y sea bo ta colecta bo azeta di cushina usa caba y deposita esaki na e companianan cu ta registra cu ta acepta esaki of bo ta deposita esaki den baki den bario caminda e ta bay wordo exporta pa den exterior nan por crea biofuel y di e forma aki nos tambe ta contribui na un economia circular,” Minister Arends a remarca.

El a agrega: “Ban atende cu esaki debidamente pa asina nos por preveni cu e tin un impacto tanto riba operacion di RWZI na Bubali, pero tambe riba nos naturalesa y na final di dia tambe riba nos salud.”

E mandatario a indica cu datonan ta muestra cu tin un espacio pa mehora. El a splica cu Aruba ta importa un total di mas di tres miyon kilo di azeta anualmente y aworaki solamente 15% pa 20% di e azeta aki ta wordo colecta back pa wordo exporta. Esaki ta nifica cu tin un espacio grandi pa mehora. El a resalta cu tur e expertonan a bisa caba cu nunca no lo por bay colecta 100% di e azeta back, pero si por yega na un total di 60% pa 70%, segun calculacion di e expertonan.

Minister Arends a subraya cu nan a bin ta conscientisa e comunidad constantemente tocante e tipo di desperdicionan cu por wordo deposita den e actividadnan di baki den bario, pero durante e ultimo dos actividadnan un biaha mas nan ta encontra asbestos den e tipo di desperdicio cu ta wordo deposita.

“Asbestos no ta wordo acepta den e actividadnan di baki den bario pa motibo cu asbesto tin companianan specifico cu tin permiso di DTI pa atende cu esaki, normanan estricto cu e companianan aki mester sigui,” el a indica.

El a señala cu den e ultimo censo a constata cu tin alrededor di mil cas cu ainda tin asbesto na nan propiedad cu mester bay wordo atendi cune, pero tin normanan y DTI tin permiso otorga na cierto companianan solamente cu mag di atende cu asbestos.

Minister Arends a enfatisa cu pa e motibo no ta acepta asbestos durante e actividad di baki den bario, tambe pasobra esaki ta representa un peliger inmenso pa salud di tur esunnan cu ta trahando den e actividad aki. “Y si abo mes ta bay atende cu asbestos den un forma cu no ta prescribi pa reglanan e ta crea un problema grandi pa salud humano, pa bo mes,” el a agrega.