Segun minister Chris Romero (MEP) tin plannan concreto pa trece actividad economico pa su districto di San Nicolas. Un di nan lo tin di haber cu e proyecto fast ferry pa e islanan ABC.
Nan tin plania pa e fast ferry tin su terminal na San Nicolas, manera a keda anuncia recientemente.
E mandatario kende ta responsabel di e cartera di transporte publico y marino a indica cu nan tin proyectonan cu lo wordo anuncia pronto cu lo genera fuente di trabou pa San Nicolas y actividad den e districto aki. Pero ademas di e fast ferry nan ta sondeando e plan te hasta pa trece e barconan crucero pariba. Un punto cu autoridad di waf APA a yega di señala y cu lo yuda alivia e area di Oranjestad di trafico, ora cu varios crucero ta drenta riba mesun dia na e waf di Playa.
Pero otro proyecto tin di haber cu un waf pa e mega yate pa trece nan na San Nicolas y bin cu e proceso di registra yatenan den nos isla.
“Tin plannan concreto caba andando y mi ta kere den e proximo lunanan sigur nos lo anuncia esaki nan caminda mi ta kere pueblo di San Nicolas ta bay tin un bida hopi grandi,” segun e mandatario. Esaki considerando tambe cu e speransa pa reestablece e refineria ta den un status di slow down.
