No semper mester asocia un menasa di un eventual temblor cu e temperatura halto cu nos ta sintiendo durante e dianan aki . E temor ey ta wordo lanta particularmente considerando cu diadomingo ultimo e pais Peru a wordo sacudi pa un temblor di 5.2 grado di magnitud lagando 4 morto, 68 persona herida y mas cu 1.200 famia damnifica den e region di Arequipa Sr. David Barkmeyer di Servicio Meteorologico di Aruba a declara na e matutino aki cu e temperatura cu a wordo registra durante e dianan aki ta obsila entre 33 y 34 grado Celsius, y e radiacion di e solo ta basta pisa banda di 1’or di merdia . Pero un factor cu tin su influencia y cu ta crea e sensacion di calor pisa ta cu e biento a cay y considerando cu biento ta un factor cu ta yuda refresca y ta alivia e grado di temperatura un poco.
Pa loke ta e grado di relacion cu tin entre temblor cu temperatura halto, sr. Barkmeyer a declara na e media aki cu tin bes nos ta haya cu tin un temporada cu awa ta cay. E ta splica cu ora cu ta bira seco di mas pa un periodo largo, bo ta haya bo cu cierto temblor di un magnitud menor cu ta sacudi e region. E ta considera e fenomeno aki como algo normal, ya cu nos sa cu esaki por sosode cualkier momento.
Igualmente el a laga sa cu loke a pasa na Peru na cuminsamento di siman tabata un temblor, pero e ta haya cu nos no mester relaciona esaki cu e situacion actual cu nos ta pasando na Aruba di calor halto.
Menasa di tsunami puro rumor
Tambe el a tende di un eventual menasa di un tsunami na Republica Dominicana, pero no ta un informacion produci pa un fuente confiabel of oficial. Pero e tabata mas tanto un tipo di rumor cu tambe a wordo plama riba social media. Sr. Barkmeyer a bisa si cu nos no mester lubida cu ta existi un volcan subteraneo bou e nivel di awa den area di Granada cu ta yama “Kick-Em- Jenny”. El a yega di tende cu e presion di e volcan tabata bastante halto cu tabata existi e temor di un erupcion submarino cu por ocasiona un tsunami. Pero e version aki nan tin cu wak den ki grado un erupcion asina por ocasiona un tsunami. “Pasobra e mester ta basta desplasamento di awa y e mester ta basta energia cu ta wordo libera pa tin desplasamento di awa te cu causa tsunami”, el a bisa. E ta aclaria cu den e caso particular aki oficialmente nan no a ricibi nada cu tin un menasa di explosion di erupcion di e volcan aki. “El a keda na rumor”, sr. Barkmeyer. E volcan Kick-Em- Jenny ta uno submarino y activo ubica na 8 kilometer for di costa nort di e isla di Granada, y ta wordo haya den loke ta wordo yama Arco volcanico di e Antia nan Menor, segun informacion adicional cu Bon Dia Aruba a compila.
