Enbes cu Banco Central traha cu empresanan pa yuda promove economia, poco-poco ta strangulando e empresanan aki.
Aruba y mundo ta pasando den un situacion di crisis, unda e placa cu ta circula a baha drasticamente. Ta momento pa busca formulanan nobo pa yuda companianan sigui draai, cumpliendo toch cu reglanan di control.
Banco Central tin, den e temponan aki, no solamente e rol di control pero tambe yuda cu e economia ta sigui bay atras. Y esaki ta tumando luga. si mira e medidanan tuma cu ta horca y na final caba cu casinonan na Aruba, cu ta parti di e pilar economico, hunto cu turismo, cu a sosode e isla aki pa decada y decadanan largo.
Restriccionnan poni recientemente, den pleno pandemia, a pone cu awo casinonan mester bay haci uzo di un servicio externo cu lo trece mas gasto pa nan y pa su clientenan.
Informacion cu Bondia Aruba ta disponi di dje ta cu Seis casino a dicidi, despues di Banco Central a prohibi nan di cambia dollars pa clientenan, di haci uzo di un filial di Western Union den nan establecimento.
Awendia no por yega cu florin ni euro den casino y cambia esakinan pa dollars. Casinonan desde nan inicio aki na Aruba tabata uza dollars y cualkier cliente cu yega cu otro placa, tabata por a cambia esaki.
Awo a trata di busca alternativa y a yega na un acuerdo cu un compania cu ya Mack’s Services di Western Union unda lo test durante seis luna largo con e sistema ta funciona. Esaki despues cu Banco Central kier obliga e casinonan aplica pa un asina yama Currency Exchange Licenses, cu normalmente banconan local ta uza.
Esaki siendo cu e Cage no ta haci tur e trabounan cu un banco local ta y lo ta exigi buki habri di delaster tur finanza di nan doñonan.
E sistema cu ta bay drenta den vigor dia prome di maart lo ta uno nada atractivo pa esnan cu kier bay hunga den casino. E lo haci e casino mas costoso. E pregunta ta cuanto mas casino lo por wanta, prome cu dicidi di cera nan portanan y na final manda hende cas.
Mester tin un formula cu por funciona debidamente pa tur partido envolví. Enves di yuda e comerciantenan aki pa por keda cu forsa pa por sigui drei den futuro, ta trata di kibra cada un di nan cu pa varios aña a sostene e economia di Aruba. Tipo di accion nan asina no ta haci Aruba un pais atractivo pa inverti den dje y of pa keda wanta compañanan habri
