Wepa mi hendenan! Undjies mi ta riba luga. Cla pa bay drumi banda di beach mi haya mi color tropical bek pasobra actualmente mi ta mes blanco cu un galinja sin seasoning. Pero bon, ban papia!
Boso sa mi hendenan, pa un persona cu ta papia tanto di feminismo, mi a realisa cu mi ta basta behind den e movement. Pasobra mi ta ripara cu hopi biaha e conversacion ta keda draai rond di hende muhe sin pone central e berdadero problema, cual por cierto ta e hende homber. Poniendo un banda bisexualidad y mi preferencia pa hende muhe. Homber pa’mi ta keda un cos stranjo. No solamente pasobra mi ta haya nan collectivamente dom, pero tambe pasobra cu mi a crece den un cas unda cu tur e miembronan tabata mayormente femenino.
Aworaki na universidad e carera di Media and Communications tambe ta masha domina pa hende muhe, pues mi contacto cu hende homber practicamente no ta existi.
Ki dia, pa casualidad ma bay hang out cu dos guy Arubiano na Amsterdam. Mi a hari te muri pasobra nan no ta make niun tiki sense. Nan conversacacionnan no tabata tin ni pia, ni cabes y nan tabata parce di tin nan secret “brocodes” tambe, pues mucho mino por a comprende. Mas mi tabata scucha nan conversacionnan mas mi tabata pensa “hombo, e mester por ta dushi ta un hende homber pasobra nan no ta worry cu nada”. Tres ora den Amsterdam ta busca nan “outfit” pa nan videoshoot, silenciosamente mi a give up riba full e especie masculino. Que cosa. Ta berdad mi ta e tipo di feminista ey cu ta duna feminismo un mal nomber, paso si ta pa’mi homber no tin ni pakico hala rosea. Bueno, cu excepcion di e cantante Ozuna. I love you Ozuna baby, marry me.
Un biaha na Checkpoint color mi a sinta papia cu un senjora di hopi mas edad cumi. E tabata contami di e dificultadnan di lanta su yiu homber. El a papia tocante con su yiu muhe no tabata tin ningun problema pa haci cosnan manera nan mester wordo haci pero cu su yiu homber el a haya hopi dolor di cabes. El a bisami “dimes e ta handycap caba. Su handycap ta cu e ta homber, anto awo en por haci nada drechi tampoco. Cu tempo el a madura si y awo cu e tin su mesun yiu homber e ta comprendemi mas miho.” Mi otro amiganan cu tin yiu hombernan mas chikito tambe sa comenta cu nan ta haci nan best pa nan lanta nan cu decencia. Specialmente ora e ta yega na con nan tin cu trata hende muhe.
Poco poco feminismo ta cambiando. Antes e tabata mas basa riba empodera hende muhe y aworaki e ta enfoca mas riba tene hende homber responsabel pa nan propio actonan. Aparentemente, mundo ya no kier tene en cuenta con fragil masculinidad ta.
Entre #MeToo y yen otro conversacionan cu ta ilustra e problema, e ta parce cu finalmente nos ta comprendiendo cu un muhe por haci todo por todo pa ta un “bon muhe” pero esey ta envano si hende homber no cambia. Por hay mi a lesa cu e manera cu nos ta cuddle up hende homber ta te hasta den nos uzo di idioma. Nos ta bisa, un ehempel. “Den dos luna 16 hende muhe a wordo viola” of “89 di cada 100 muhe ta admiti di ta victima di acosa sexual”.
Nunca nos ta bisa 16 homber a viola hende muhe den dos luna of hombernan ta acosa muhenan sexualmente riba pia di trabao. Pues semper nos ta menciona e danjo cu ta wordo haci sin menciona ta ken ta haci esaki. Cu tur dolor na mi curason, mi ta admiti te hasta ami ta culpabel di esaki. Tiki tiki, mi tambe ta sinja, e berdad ta mi hendenan cu e problema no por keda afo di e solucion. Siguiente biaha cu nos kier papia feminismo, wak pa e hende homber haya un luga na e mesa.
