E ta hopi biaha un figura solitario ta cana practicamente tur mainta na costa nort di nos isla, of ta explora rooinan di Aruba. Pero no kere cu Jourelle Goeloe (42) ta sinti su mes su so. Al contrario, pa Jourelle, cana den mondi ta mes natural p’e cu hala rosea of blink wowo.
Pasobra ta asina el a pasa su hubentud. “Mi tabata gusta ta den mondi, den naturalesa desde cu mi tabata un mucha di cinco. Di e tempo ey mi tabatin mondi pa mi so.” Jourelle a lanta na Rooi Master, den un cas Arubiano cu su welo di su mama a traha. “Nos tabata leu di tur hende. Sin bisiña, sin otro mucha pa hunga. Pues mi tabata djis busca mondi.” Y aunke cu e grandinan tabata preocupa de vez en cuando cu Jourelle tabata pasa hopi ora ta hunga den mondi, nunca nan por a stop e di bay busca aventuranan den mondi.
Y e interes pa mondi y naturalesa di Aruba nunca a kita. Ni despues cu el a casa y haya yiu. Pero, tabata un incidente cu a shock henter Aruba cu a pon’e realisa cu e mester bolbe den naturalesa. “E tabata e dia cu Natural Bridge a cay,” Goeloe a conta. “Esey tabata e momento, como adulto, cu mi a realisa cu mi mester bolbe y descubri. Mi a haya hopi duele, pasobra nunca mi a hiba mi yiunan bay wak e Natural Bridge.” Y berdad nan no a conoce Natural Bridge, pero nan conoce tur parti di mondi di nan isla, arenanan cu prome nan mama tabata explora.
Awe tur tres su yiunan ta studia na Hulanda, pero cada biaha cu nan ta Aruba, nan ta den mondi. E famia a scoge pa biba den un area na Piedra Plat, cerca di Santa Rosa. Aunke no mes leu di hende, yiunan di Jourelle a lanta memey di e piedranan grandi di Piedra Plat, un area cu tin un number tipico, Biburi. “Y dos aña pasa nos a dicidi pa explora e barancanan, y eynan tambe tin pinturanan prehistorico,” Jourelle a conta Bon Dia Aruba, kende a bisa cu manera Biburi, tin hopi tesoro tur caminda na Aruba.
. “Mi ta cana tur dia. Mas tanto mainta, y tin biaha atardi. Hopi biaha mi ta bay mi so, of cu mi casa, ora cu e bin di trabou. Pero ultimamente mi ta hayando mas y mas hende ta pidi mi pa mi hiba nan bay cana cu mi. Y mi ta haci’e.” Awor e tin un persona fiho cu ta cana cune tur Diadomingo, pero cualkier hende cu yam’e pa bay hiba nan bay cana riba Diasabra, Jourelle ta cla pa sirbi como guia. “Nos isla tin asina hopi cos bunita pa wak.” Un di e areanan faborito di Jourelle ta di Andicuri te Daimari, pasobra tin un rikesa di naturalesa enorme cu e lo kier pa mas hende aprecia.
Es mas, Jourelle ta manera un ranger extraordinario. E no tin problema pa cana e mesun ruta tur dia, tin biaha cinco biaha tras di otro, pasobra tur biaha e ta topa cu algo nobo. Sea ta e luz cu ta dal den e barancanan, un mata cu a crece, of hasta un grot subteraneo cu ningun hende prome cune tabata sa cu a cuminza forma. Y Jourelle no ta egoista, e no ta tene e hallazgo pa su mes. Al contrario, tur hende cu kier, e ta mas cu dispuesto pa mustra aspectonan bunita di nos pais. “Tin asina hopi joya. Hende no ta realisa cuanto joya e isla aki tin. Mi por cana berdad e mesun ruta, pero cada biaha ta topa cu algo nobo.” Y e nobo kizas ta e experiencia. Cada caminata ta un experiencia riba su mes, pasobra e sentimento, e emocion e momento ey, tur dia ta diferente. “Mi ta pasa mi tempo ta papia cu matanan cu mi ta topa,” Goeloe a conta ta hari. “Mi por pasa henter a cana ta papia cu naturalesa, mi so.”
P’esey mes, Jourelle ta preocupa cu e cantidad di UTV/ATV cu ta haciendo uso di ‘su’ ruta. Aunke cu e kier comparti, locual e no kier ta pa abusa di naturalesa. Mescos cu e ta gusta hiba hende cu pidie, su deseo ta pa e persona namora di e naturalesa, e mondi di Aruba, mescos cune. “Pero no tur hende tine den nan. Hasta esnan cu ta cana den e area. Algun ta cana pa baha peso, y no ta gosa di e medio ambiente. Ami no ta cana pa baha peso, sino pa ta memey di e naturalesa.”
Jourelle Goeloe a bira boluntario pa Turtugaruba y ta preocupa cu tur e marcanan di e buggies, UTV, ATV den santo, riba e neishinan di turtuga. Of tur e erosion cu e mashinnan ta causa. “Pero, tambe ta mescos cu e eventonan ‘off-road’ cu hopi Arubiano ta organisa y ta gosa di dje. Ami no tin problema cu nan kier core rond. Pero e sushi cu ta laga atras ta increibel.” Esey ta algo cu ta pone Jourelle Goeloe rabia masha hopi mes. “Con hende por simplemente susha? Asina nan mayor a lanta nan? Cu nan por tira tur cos pafo? Pakico no bay cu un saco y wanta e sushi den auto?”
Y kico Jourelle haci? Dialuna a bira dia di piki sushi. Tur Dialuna e ta bay cu su saco di sushi pa ora cu e bay cana. Y e ta piki sushi. E por zundra, tin biaha a hasta pensa si ta bale la pena kico e ta haciendo. “Pero esaki ta nos isla, y nos no kier pa turistanan mira e isla sushi asina.”
Y recien, Jourelle, kende ademas tin e hobby di ‘crafting,’ esta obra di man, a dicidi pa haci algo ma cu naturalesa. Como ‘crafter’ e ta sigui diferente pagina di Instagram dedica na creatividad. Y un di nan tabata ‘Kindness Rock Project.’ E grupo aki ta pone mensahe riba Piedra y ta laga nan atras pa otro lesa. “Mi ta hay’e un poco raro cu mi mes ta zundra cu ta laga sushi atras, y cu mi mes ta piki nan. Pero dos luna pasa, ma cuminza skirbi mensahenan di animo riba piedra y laga nan riba e ruta cu mi ta cana.” E piedranan ta coleccion di Jourelle mes, cu ta prepara cada uno, y ta laga mensahe sea na Papiamento of Ingles. Y tur ta mensahenan positivo. Sea ta djis un ‘bon dia’ of otro cu ta duna animo. “Y mi no ta haya ningun di e piedranan cu mi a pone. Tin biaha, e dia siguiente, ya nan a desaparece. Y mi a cuminza mira nan riba TikTok. Mi mes no a kere cu e lo a bay asina lihe.” Y locual Jourelle a haya mas bunita, ta cu recien, e mes a topa cu un piedra skirbi, poni den mondi. El a lag’e, pero e por garantisa esun cu a skirbi e palabranan, cu nan a haci’e contento. Y ta esey e kier cu su piedranan, cu su caminatanan, pa otro hende tambe ta contento.
E mucha cu a lanta na Rooi Master, no a caba di cana den mondi. Di Andicuri pa Rooi Juditi, tur ta keda hopi special y unico. “Nos pais ta asina bunita. Nos cadushi y hubada y mucho mas cu esey. Nos tin joya riba e isla aki,” Jourelle Goeloe a bisa.
