No por resolve problema… Di sushi na Aruba mes…

Aruba ta progresa economicamente, esey ta obvio pa nos tur. Pero segun cu esey ta sigui cana bon, mas nos ta cuminza mira unda nos no ta avanza. Nos tin hopi problema, y grandi, sin cu nos por mira un maneho diligente cu ta brinda perspectiva. Un di e lamentonan constante ta e situacion di procesamento di desperdicio. Mientras cu di un banda nos ta tende sonido positivo, manera e aparente mehoracion di e situacion financiero di Serlimar, pero e situacion mes di e lugarnan di acumula desperdicio, principalmente Parkietenbos y Sero Teishi, ta keda mes problematico. Pa añadi algo encuanto e situacion na Serlimar, banda di e bon noticia cu en berdad por mira cu aña 2022 a termina cu un saldo positivo di Afl.1,441 miyon, esey no tabata e fin di e problema financiero. Pa aña 2023 ta premira un saldo negativo, pero mester bisa acerca cu gobierno ta anticipa un necesidad menos grandi di subsidio, di Afl. 2,2 miyon menos, lagando ainda un deficit pa cubri di Afl. 1 miyon. En todo caso ta predicible cu Serlimar lo sali di e problemanan grandi cu a conduci na e ‘surseance van betaling’ algun aña atras.

Pero awor e problemanan grandi mes; e procesamento di desperdicio. E problema mayor no ta solamente e asunto mes, sino e falta di un maneho ministerial cu ta indica unda nos ta bay. Nos no mester ta un genio pa conclui cu nos tin actualmente un maneho di ‘carga cos hiba otro caminda’ pero no tin un maneho di varios opcion cu ta hiba nos den futuro na un control riba loke nos ta produci na desperdicio y con pa deshaci di esey. Di tur manera ta visto cu nos no por keda maneha cos na e manera mancaron actual, unda no por yega na otro conclusion cu dera desperdicio na Sero Teishi no ta resolve nada, e barionan cu ta keda mas pabao ta keda haya e molester di mal holor. Y den sentido di planificacion urbano ta logico cu, si ta papia di move algo, no por move e areanan habita, pero mester busca un solucion den kita e molester di unda e ta awor. Nos por comprende cu ta facil pa bisa esey pero: unda otro bo kier bay anto? Nos no por bay na un siguiente lugar unda nos ta bay bolbe sacrifica area natural pa e siguiente dump cu aki tanto tempo ta bira blanco di critica tambe, y cu razon!

Poco poco nos ta yega talvez na e momento cu nos ta realiza cu nos mester amplia nos vista pa loke ta e opcionnan cu nos ta contempla. Haciendo esey nos ta bin topa cu un par di hecho cu nos no por ignora mas. Nos pais ta demasiado chikito pa por sostene un poblacion di e tamaño actual, si nos ta tuma como punto di salida cu nos mester por regla y acomoda tur necesidad localmente. Nos ta bibando hopi tempo caba aceptando e realidad cu nos mester importa tur cos cu nos ta come, biba y bisti y tur demas cos cu nos mester. Pero nos ta keda ignora e hecho cu si nunca no ta sali nada di e lugar aki, cu loke mas di 100.00 hende ta produci na desperdicio, anto nos lo mester hoga dado momento den nos propio sushedad… En todo caso, nos no ta leu mas di e situacion ey. Ta e momento clave anto pa cuminza pensa riba exportacion di desperdicio, y cu esaki nos no ta referi solamente na e categorianan exportable awor caba, manera auto bieu, bateria, y metal, sino tambe di e resto di desperdicio pa cual nos no tin un solucion. Nos a pasa caba den henter e proceso di propaganda di kima desperdicio aki mes, pero esey no ta un solucion viable, mientras cu tin solucion, y no aki… Mas di diez aña pasa na varios ocasion un delegacion comercial di Colombia tabata puntra explicitamente si Aruba no por considera exporta diferente tipo di desperdicio, y tambe e residuo cu ta keda cu no por recicla, pasobra na e pais ey tin industria cu ta usa e tipo di desperdicio ey pa kima na escala grandi pa suministra energia cu mester den e proceso di, entre otro, produccion di cement. E motibo pakico no a duna oido na e sugerencianan aki tabata uno netamente politico, unda e actor principal entre e ministronan no tabata kier tende di e opcion pasobra e tabatin plannan pa bin cu un incinerador grandi cu lo a costa nos otro mitar biyon florin… Manera semper, no ta costa un mandatario nada pa papia di e tipo di suma aki, pasobra no ta e mester pone e placa, pero anos si! Anto tin un detaye mas, pa nos no lubida: na e pais bisiña tabatin interes tambe pa e material cu si por recicla, loke ta significa menos costo di transporte cu hiba nan na otro pais mas aleha.

Den e situacion cu nos ta awor, unda un mucha di scol basico mes por mira cu nos no por sigui den e rumbo actual, simplemente no tin lugar di warda sushi mas, sin molestia y causa daño na salud di nos poblacion. E problema ta cu nos tin un gobierno cu ta sobresali den conta nos cu nan ‘lo haci yen di cos’. Mescos cu nan, nos tambe por ta contento cu economia ta move bon atrobe; pues awor ta e momento pa realmente atende e asuntonan aki, cu un vista mas amplio cu loke nos a mira te awor.